Premiu en Cáceres a un estudiu asturianu sobre idioma y nacionalidá

La ciudá de Cáceres (Extremadura) dio a conocer anteayeri'l fallu de so V Certame Cultural d'Artistes Mozos, del que resultó vencedor na modalidá de lliteratura, l'autor asturianu Pablo Rodríguez Alonso pol so ensayu "Idioma, nacionalidá y conflictu". El trabayu d'esti xixonés llicenciáu n'historia pola Universidá d'Uviéu resultó'l meyor al paecer del xuráu d'ente les 61 obres lliteraries de poesía, ensayu y narración que se presentaron al concursu, faciéndse acreedor a los 600 euros del premiu, que-y van entregar nel salón d'Actos de la Casa Conceyu cacereña'l próximu día 16.

L'ensayu del historiador asturianu tien un llargor de 53 fueyes y estrémase en dos bloques nos que s'analiza, en primer llugar, el papel de les llingües como exe del discursu nacionalista tanto nos nacionalismos estatales como nos nacionalismos ensin estáu. Una segunda parte afonda nel procesu de nacionalización llingüística n'España dende l'afitamientu de la monarquía na edá media y renacimientu pasando pel estáu lliberal hasta llegar a la platiya monollingüe dafechu que llantó la dictadura franquista.