Premiu del W3C pa una asturiana

Cristina González, estudiante d'Inxeniería Técnica de Telecomunicaciones de la Universidá de Uviéu, recibió ayeri'l primer "Premiu W3C a la Estandarización Web" qu'entrega la oficina española del consorciu mundial.

El proyectu de la estudiante asturiana, que recibió un añu de beca d'investigación aplicada pa desarrollar la idea completa del proyectu na Fundación CTIC y un portatil d'última xeneración, entitúlase "Llibrería pa la representación de gráficos estadísticos utilizando SVG" y analiza'l desarrollu de soluciones abiertes pa la tresmisión de gráficos estadísticos pa estremaos dispositivos electrónicos.

L'asturiana impúsose a otros dos proyectos d'estudiantes de la Universidá San Pablo CEU de Madrid y la Universitat Ramón Llull de Barcelona. Pola primera presentábase Antonio Quintáns Ocaña, con un proyectu de "Portal Multiplataforma" que s'enconta nuna aplicación qu'apurre un un sistema d'alministración de conteníos, mientres que pola universidá catalana presentábase Xavier Sánchez Taixé col proyectu "Desarrollo en Web Semántica con Servicios Web de Ontoloxíes" una aplicación de Servicios Web pa la recuperación de ontoloxíes de Web Semántica.

Ye la primer vegada que la oficina española del W3C da estos premios, que s'entregaron nel Hotel de La Reconquista d'Uviéu nun actu nel que tuvieron el director del W3C n'Europa Daniel Dardailler, Ivan Herman, Director Mundial d'oficins del W3C y José Manuel Alonso, Responsable de la Oficina Española del consorciu que dirixe'l Premiu Príncipe d'Asturies Tim Berners Lee, ún de los padres de la rede internet . Dende Asturies.com nun podemos facer otro que mostrar el nuestru contentu en cuantes que Cristina García ye una de les persones que collaboren na programación del sistema que fai posible la esistencia de Asturies.com Radio
Más información na web del W3C y na páxina de Cristina González Cachón