Premiu a la identidá

La llingua asturiana ye asuntu d’opinión pública n’Asturies. Simpatizantes y detractores mueven ficha cada día pa sofitar o perxudicar al idioma. Los Premios Andrés personalizaron na so 26 edición los exemplos más bultables del 2010.

El Salón d’Actos del Antiguu Institutu Xovellanos de Xixón taba hasta la bandera. Nun ambiente familiar y interxeneracional, asturianistes culturales, políticos y llingüísticos arrexuntábense ente les butaques. La causa; homenaxear nesti actu a la llingua asturiana y al fináu Andrés Solar, ún de los poetes más destacaos del surdimientu asturianu.

Les palabres de Naciu Varillas dieron empiezu a los XXVI Premios Andrés Solar. El periodista xixonés presentó l’actu acompañáu por Carlos Pulgar y Ramsés Ilesies, militantes de la Xunta Pola Defensa de la Llingua Asturiana. Xunto a ellos, El Pegollu y El Madreñazu; la cara guapa y fea d’estos premios.

El Madreñazu y El Pegollu
Despilfarru foi la palabra; El Madreñazu la consecuencia. El Conseyeru d’Educación y Ciencia, Herminio Sastre, dixo que diba recurrir la sentencia del TSXA qu’anulaba la ratio mínima d’ocho alumnos pa poder estudiar asturianu na ESO. Amás, calificó col mentáu términu economicista los derechos de los falantes y la sentencia xudicial. Too esto, personificó nél les actitudes más negatives pa col idioma nel 2010.

En positivo, el programa de la TPA Camín de Cantares recibió El Pegollu. En palabres del xuráu “el so apueste decidíu pola llingua a lo llargo de seis temporaes”, foi’l motivu pa qu’esti espaciu televisivu y, en concreto, el so realizador Ramón Lluis Bande y el so conductor Xosé Antón ‘Ambás’, llevaren el reconocimientu d’apoyu al asturianu mientres esti últimu añu.

Les crítiques d’Ambás
“Dempués de llevar casi venti años grabando a tanta xente per tantos llugares, yo pensaba que qué importante sería qu’esto qu’Ambás vive día tres de día lo conociera’l país asturianu”, asina escomezó Xosé Antón ‘Ambás’ la so intervención tres de recibir a manes de la hermana d’Andrés Solar, Lali Solar, El Pegollu 2010.

L’etnógrafu sorrayó la importancia de recoyer y recopilar el “patrimoniu inmaterial que ye la tradición oral d’Asturies, que ta morriendo”. Nesti sen, reconoció’l llabor del programa que presenta, de toles persones que participaron nél y, penriba de too, de que lo recopilao seya d’usu públicu, a la contra de los archivos privaos de tradición oral.

“Paez que muncha xente del asturianismu siente vergoña porque Ambás sal falando en ‘Camín de Cantares’ nes diferentes varidaes del idioma, o del gallego-asturianu”, continuó ‘Ambás’ nel so discursu críticu. D’esti mou valoró les varidaes llingüístiques d’Asturies y la importancia de que, a la par que colos cantares, haiga un fondu documental de too ello.

La última de les crítiques que’l etnógrafu fixo foi pa col pocu averamientu que’l asturianismu tuvo pa cola xente de la cai: “Siempre tuvimos de culu al pueblu; a los que caltuvieron la identidá; a esa xente que sal en ‘Camín de Cantares’ cantando y contando”, por eso destacó’l papel d’estes persones anónimes y finó la so intervención señalando que “esti pegollu nun ye pa Bande nin p’Ambás; ye pa tol pueblu asturianu y pa tola xente que mantuvo la identidá y l’idioma”.

Avance a sentencies
Tres del xaréu d’aplausos qu’acompañó a la intervención d’Ambás, tocó-y el turnu al voceru de la Xunta Pola Defensa de la Llingua Asturiana, Carlos Pulgar. L’activista llingüísticu entamó recordando “l’exemplu y la memoria del compromisu” d’Andrés Solar y sorrayó que “hai que siguir lluchando un añu sí y otru tamién pola dignificación del idioma, polos derechos de los falantes y por un futuru posible y merecíu”.

“Esti añu ta siendo l'añu nel que diferentes tribunales de xusticia tán sentenciando a favor de los derechos de los falantes y en contra del incumplimientu sistemáticu de la llexislación vixente pol aparatu y l'entramáu político-burocráticu asturianu”, señaló Pulgar faciendo balance del 2010 en materia d’avances llingüísticos.

Xunto a les crítiques al incumplimientu del gobiernu asturianu “de les lleis democrátiques y al respetu de los derechos ciudadanos” y la presencia “marxinal” de la llingua asturiana nos medios de comunicación, Pulgar faló d’El Pegollu y el Madreñazu d’estos XXVI Premios Andrés Solar.

“Políticu de conveniencia típicu que lleva años y años pasiando per diferentes puestos, cargos, direcciones y conseyeríes; hasta qu'a la fin llega de rebote a Educación”, opinó’l voceru de la Xunta sobre’l ganador del Madreñazu d’esti añu. En cuantes a ‘Camín de Cantares’, destacó “la emoción ante unes persones que nos últimos años tienen regalaonos más de 100 documentos imprescindibles pal nuestru patrimoniu”.

A lo último, Pulgar fixo un llamamientu “a la movilización y al trabayu de tolos defensores del idioma”, porque como argumentó, van venir unos meses per delantre nos que “hai que tar sollertes pa que nun se pisen los derechos de los falantes nes contiendes polítiques y les posteriores negociaciones”.

Suenen los raigaños
Los XXVI Premios Andrés Solar acabaron col son del país. Xosé Antón ‘Ambás’ púnxose al frente d’una esbilla de la montonera músicos que, xunto a él, reellaboraron el raigañu sonoru d’Asturies en ‘Camín de Cantares’.

Pepín de Muñalén, Alberto Ablanedo, Lisardo Prieto, Dolfu Fernández, Llorián García, les componentes d’Herbamora, Santi Caleya, Merce Santos, Xuan Nel Expósito y Ramsés Ilesies; punxeron-y el toque musical al actu nun conciertu que, como bromió Ambás, “ensayóse namás que pel youtube”.

A lo último y nún de los momentos más emotivos del actu, cantó nel escenariu Celo, llangreanu que protagonizó per dos vegaes ‘Camín de Cantares’ y que tuvo nos Premios Andrés Solar en representación de toles persones que caltienen vivu esti país tresmitiendo la so identidá.
 
Semeya prestada por Andresín Rodríguez Monteavaro