Premios del Centru Européu d´Empreses y Innovación

El Centru Européu d´Empreses y Innovación d´Asturies entrega güei los premios a la promoción empresarial. Cada añu, esti organismu de fomentu d´empreses entama unes xornaes de promoción del espíritu empresarial empobinaes a reconocer la función social del empresariu y a da-y prestixu a la figura del emprendedor. Na edición d´esti añu van dase tres premios: Premiu al Meyor Proyeutu Universitariu n´Asturies, Premiu a la Meyor Iniciativa Empresarial del Taller d´Empresarios y Premiu del Concursu de Miniempreses nos Centros Educativos.

Los ganadores del premiu dedicáu al ámbitu universitariu foron esti añu pa ASE - Asturiana de Señalización, NATEC Ingenieros y el Centro de Risoterapia. Nel premiu a la meyor iniciativa empresarial ganaron nesta edición 2BitMedia, Centro de Día Emérita, Deejasystem, La Salgar y Externatur,S.L..Nel Concursu pa la puesta en marcha de miniempreses nos centros educativos llevó'l primer premiu'l proyectu del Institutu Mata Xove de Xixón pa facer un taller de recuperanza d´equipos informáticos. Col segundu premiu marchó l´Institutu de Cangas del Narcea pol proyectu "Narcea Prototipo" y col tercer premiu l´Institutu Altu Nalón de Barredos pola so Revista Estudiantil.