Pravia yá va unviar a Política Llingüística la documentación que completa’l so espediente toponímicu

El procesu pa la recuperación de la toponimia tradicional del país nun apara, cola intención de que tea fináu l’añu qu’entra. Pravia, ún de los once conceyos pendientes d’oficializala, ta próximu a remitir a la Conseyería de Cultura, Política Llingüística y Turismu la documentación que completa’l so espediente toponímicu, según confirmó l’alcalde David Álvarez Suárez a Berta Piñán.

El trabayu en Pravia ta en marcha dende hai dellos años, y nel 2018 paecía que taba próxima l’aprobación del decretu toponímicu definitivu, con alcuerdu nel Plenu, pero un problema a la hora de treslladar la documentación a la conseyería dilató los tiempos. Hasta agora, cuando paez que por fin va poder dase’l pasu definitivu que faiga que la toponimia tradicional del conceyu sía la única oficial.

Álvarez Suárez treslladó esti avance nel procesu ayeri a la conseyera Piñán nuna visitar de la conseyera, xunto cola direutora xeneral de Deportes, Beatriz Álvarez Mesa, p’anunciar que Pravia, Villa Europea del Deporte 2021, va acoyer la próxima Gala del Deporte Asturianu. Los otros diez conceyos pendientes d’oficializar los sos nomes de llugar tradicionales son Llanera –tamién col trámite avanzáu–, Castropol, Somiedu, Cuideiru, Ayande, Caravia, Ibias, El Valle Baḥu de Peñamellera, Salas y Navia.

Na semeya, Álvarez Suárez y Piñán nel Muséu del Prerrománicu de Santianes.