PP y IX-LV critiquen la decisión de FAC y PSOE de nun celebrar Plenu esta selmana na Xunta Xeneral

El PP y IX-LV amosaron la so disconformidá pola decisión de FAC y PSOE de nun celebrar Plenu esta selmana na Xunta Xeneral. Los dos partíos reclamen qu’haya actividá nel Parllamentu asturianu dende yá.
 
La Xunta de Voceros del Parllamentu asturianu tomó güei esta decisión col apoyu de los dos partíos con más representación, según confirmó’l presidente de la Xunta, Fernando Goñi. El popular cree necesario qu’haya actividá parllamentaria “lo antes posible” y por eso prefería que principiasen los plenos de la Cámara esta mesma selmana. Goñi entiende que los plenos d’esta llexislatura tienen más sentido que nunca si se tiene en consideración que la composición del Parllamentu ye “mui plural” y que, nes condiciones económique actuales ye necesario conocer los planes del Gobiernu. Amás destacó qu’esta selmana diben a principiar les comisiones y les comparecencies, “pero al Gobiernu nun-y encaxaben na so axenda”.
 
Pela so parte, el vocero d’IX-LV, Jesús Iglesias, considera “imprescindible” que la Xunta Xeneral entame a funcionar. Iglesias dixo tar preocupáu pola posibilidá de que la “parálisis” del Gobiernu de Francisco Álvarez-Cascos se sume la del Parllamentu. Decisiones como la de posponer el Plenu, según el vocero de la coalición, nun contribuyen a llexitimar la política ante los ciudadanos. “Queríamos qu’hubiera Plenu esta semana porque ye urxente qu’empiece’l trabayu na Cámara”, manifestó.
 
El voceru del partíu del Gobiernu, Enrique Álvarez Sostres señaló que la decisión de nun entamar el Plenu vieno d’una mayoría de la Xunta de Voceros y afirmó que “facelo esta selmana nun entraba na programación política de dos grupos”.