Porcía y Ribeseya centren l’actividá musical de la fin de selmana nel país

Esti sábadu hai n’Asturies dos cites musicales d’importancia. Nel conceyu d’El Franco tien llugar la XXXI Noite Celta de Porcía, la decana de les que s’entamen nel país. Mentes, pal oriente, va celebrase’l VII Ribeseya Rock con Dixebra y Desakato como bandes principales.

El Campo del Alameda, isla fluvial arrodiada pol ríu Porcía –ensin dulda ún de los escenarios más guapos del país–, va enllenase de xente y de sones musicales atlánticos dende les 22.30 hores. Nesta ocasión, l’Asociación Cultural Alameda dispón una folixa que tien como convidaos a la Banda Gaitas El Trasno, Vrienden, Corquiéu, John McSherry & Sylvain Barou & Rubén Bada & Pádraig Rynne, y La Tarrancha. Cinco formaciones que van facer disfrutar y baillar a los asistentes hasta bien entrada la madrugada, polo que la organización va caltener el so yá tradicional puestín de sardines a la plancha –el preciu, la voluntá– cola fin de garrar fuercies pa la llarga nueche.

Mentes, nel otru estremu del país, les guitarres llétriques va ser protagonistes. Celébrase una edición nueva del Ribeseya Rock –la sétima–, que pel camín perdió’l topónimu tradicional de la cartelería oficial. Tamién de baldre, los conciertos van principiar nel prau averáu al polideportivu a les 21.30 hores cola actuación de Minoría Agresiva, pa depués dar pasu a Almatrampa (22.45 hores) y Desakato (00 hores). La banda referencia del rock n’asturianu, Dixebra, va encargase de zarrar el festival a partir de la una y media de la madrugada.