Política llingüística organiza unes xornaes de toponimia en Castropol

El próximu vienres 18 de mayu , la Casa de Cultura de Castropol va ser l'escenariu, dende les 5:30 de la tarde, de la II Xornada de Toponimia del Eo-Navia, que baxo'l títulu xenéricu "A Ría del Eo" ta organizada pola Xunta Asesora de Toponimia del Principáu y pol Conceyu de Castropol.

L'actu central d'esta Xornada va ser la presentación del Informe y conclusiones de la Comisión pal Estudiu de la Denominación de la Ría.

Esta Comisión, formada en xunu del 2006 pola Xunta Asesora de Toponimia, trabayó varios meses faciendo, a nes dos orielles d'esta ría, encuestes de campu y investigaciones documentales históriques y actuales, col oxetu de dar col nome popular del "accidente xeográficu que fai de frontera ente Asturies y Galicia". El documentu que recueye les sos investigaciones va ponese agora a disposición de los organismos competentes.

Nesta Xornada de Toponimia va presentase tamién les Actes de les I Xornaes de Toponimia del Eo-Navia, que se fixeron en A Caridá (El Franco) en mayu del 2006. Trátase d'un llibru onde se recueyen les intervenciones de los especialistes que falaron ellí sobre la toponimia dende los aspectos llingüísticu, xurídicu, políticu y económicu, incluyendo trabayos como'l del xurista José Manuel Pérez sobre les consecuencies xurídiques de la oficialización de los topónimos tradicionales y sobre la integración de la toponimia nos planes de desarrollu rural del xeógrafu Alfredo González.

La II Xornada de Toponimia del Eo-Navia va echar el piesllu cola conferencia de Mónica Loza López y Fanny López Valledor sobre los nomes de los sitios de Castropol, conceyu nel que trabayaron na ellaboración del su espediente toponímicu.