Política Llingüística estrena’l catálogu dixital bibliográficu asturianu

Dende esta selmana ta disponible na rede, dientro de la web de la Oficina de Política Llingüística, el Catálogu Dixital Bibliográficu Asturianu, un serviciu que la Oficina de Política Llingüística presenta como una monumental base de datos na que s'inxerta tola producción bibliográfica en llingua asturiana dende 1975 al 2007. El catálogu ofrez tres criterios de busca, colos sos correspondientes campos pa cubrir: autor, títulu de la obra, editorial y añu d'espublizamientu.


El Catálogu Dixital Bibliográficu Asturianu, que se da anuncia que va medrar coles sucesives actualizaciones, preséntase como "la mayor base de datos nel so xéneru" y como una "ferramienta perútil pa los escritores, editores, estudiantes, profesores y en xeneral toa mena de públicu que quiera averase a la nuestra lliteratura y actividá editorial".


D'otra manera, el Boletín Oficial del Principáu d'Asturies, nel so númberu del 4 de xunu del 2007, espubliza'l Decretu d'oficialización toponímica del Conceyu de Casu, aprobáu en Conseyu de Gobiernu del pasáu 17 de mayu. Casu ye ún de los 24 conceyos d'Asturies que, a día de güei, cuenten con Decretu pol que se reconoz oficialmente la so toponimia tradicional.