Política Llingüística entama un cursu d'encuestadores de toponimia, dialectoloxía y cultura tradicional

La Oficina de Política Llingüística organiza'l II Cursu d'encuestadores de Toponimia, dialectoloxía y cultura tradicional. Trátase de la segunda edición d'esti cursu, dirixíu por Xulio Viejo Fernández y que na so primer edición contó con una gran acoyida, participando nel mesmu 50 persones. Pa esta segunda edición, que va entamar el 13 de marzu y va durar hasta'l 19 d'abril, les clases van ser les tardes de los martes, miércoles y xueves na Faculta de Filoloxía d’Uviéu n’horariu de 6 a 8. Apuntase ye de baldre y les inscripciones pueden facese hasta'l mesmu día 13 de marzu na sede de la Oficina de Política Llingüística na Conseyería de Cultura, y los profesores del cursu van ser Fernando Álvarez-Balbuena, Ramón d'Andrés, Xulio Viejo Fernández, Héctor Xil, Felipe Fernández, María Antonia Pedregal Montes, Jesús Suárez López, Xosé Antón Fernández "Ambás", Llinu Álvarez Santidrián y Ramón Sordo Sotres.