Polémica pola web de la "Pita de la Xunta"

La Xunta Pola Defensa de la Llingua Asturiana espublizó esta mañana un comunicáu en que diz que la organización recibió una carta del Principáu avisando de la intención que tienen d'entamar acciones llegales pola propiedá del dominiu n'internet www.tiniareces.com, que de va delles selmanes ye la dirección n'internet de la Pita de la Xunta, el célebre animal de trapu que anda al rau del presidente del Principáu d'Asturies nos actos públicos pa protestar pola situación del asturianu.

El principáu basa la reclamación del dominiu en que la esistencia d'esa páxina con esa dirección supón un dañu a la imaxe pública del Presidente asturianu, pero dende la Xunta Pola Defensa de la Llingua entienden que cola posesión d'esi dominiu nun se ta faltando al respetu de la persona del Presidente en funciones del Gobiernu d'Asturies, Álvarez Areces y polo tanto nun tienen intención nenguna de devolver el dominiu.