Poesía asturiana en Luxemburgu

L'actu va tener llugar esti sábadu día 25, onde ASBRU, en collaboración col "Centru Cultural Antonio Machado" organiza na Llibrería Intermede de Luxemburgu una llectura de poesía asturiana cola participación de Xuan Bello, Martín López-Vega, Javier Almuzara y Julio Rodríguez, cuatro poetes mozos que representen la poesía más nuevo del país en llingua asturiana y castellana. Na primer llingua esprésase lliterariamente Xuan Bello (Paniceiros-Tinéu 1965) el más veteranu de los cuatro y que se diere a conocer yá nel añu 1982 col so llibru "Nel cuartu mariellu", entamando una carrera ascendente hasta llegar a los sos títulos más de recién como Paniceiros o Los cuarteles de la memoria. Asturianu y castellanu mez na so obra Martín López-Vega (Llanes, 1975) redactor del suplementu "El Cultural" del diariu "El Mundo" que ye autor d'obra en castellanu y de los poemarios n'asturianu Les coraes de la roca y Esiliu. Pela so parte, Javier Almuzara (Uviéu, 1969) ye autor de los llbros de poemes "El sueño de una sombra" "Por la secreta escala" y "Constantes vitales" col que ganó'l II Premiu "Emilio Alarcos" de poesía, mientres que Julio Rodríguez (Uviéu, 1971) foi finalista del Premiu Planeta del 2003 cola novela "El poeta más grande del mundo".

ASBRU - Asturianos en Bruseles, ye un colectivu nuevu d'emigrantes asturianos mozos na capital belga que, en paralelu a la madrileña ASMA, representa la espresión agrupativa d'una xeneración nueva d'emigrantes asturianos. Ente los sos oxetivos ta'l dar a conocer Asturies nel esterior y sirvir como foru onde se puea debatir la realidá política, social y económica d'Asturies y la so emigración.