Podemos retira l’espediente a Xune Elipe, qu'esixe "que se respete escrupulósamente l'orde de la llista eleutoral"

La direición de Podemos Asturies confirmó esti llunes que va rexistrar a Cova Tomé como candidata del partíu pal 28-M y que va dexar fuera a los sancionaos o espedientaos, pero non el cuerpu de la llista. Xune Elipe, al que'l ‘Comité de Seguridad y Salud Llaboral’ retiró recién l’espediente abiertu, esixe “que se respete escrupulósamente l’orde de la llista eleutoral” énte la posibilidá de la inclusión d'independientes que pudieran baxar al avilesín o a Laura Tuero, númberu 3, na mesma.

“En vista de les sos alegaciones y llueu de proceder a les comprobaciones pertinentes, comunicamos-y que se-y esclúi como persona afeutada d’esti espediente”, foi’l mensaxe que recibió per corréu electrónicu Elipe d’un comité “qu’entovía nun sé quién lu forma”, espresa. D’esta forma, y depués de les declaraciones feches esta mañana por Rafael Palacios –“la llista que se va rexistrar ye la que salió de les primaries y la llista compuesta por toles persones que foron elexíes pola militancia y que nun tienen nenguna sanción nin nengún espediente de sanción en cursu”, aseguró–, la presencia d’Elipe quedaría confirmada, pero non la posición na que resultó escoyida nes primaries, esto ye, como primeru del cuerpu de llista.

“Esixo que se respete escrupulósamente l’orde de la llista eleutoral”, espresó Elipe depués de la confirmación fecha por Palacios y de la retirada del espediente. El de Villalegre debería ocupar el númberu 2 y Tuero, el 3, anque se teme dalgún movimientu como podría ser la inclusión d'independientes que moviera estes posiciones.

“Nun confirmaron la llista y esi corréu electrónicu ye papel moyao. Nun nos convocaron a los candidatos pa dicinos que l’orde ye’l de les primaries. A día de güei los candidatos nun saben si van dir na llista nel puestu que decidió’l 60 por cientu de los inscritos”, añadió.

Tomé y tol so equipu vien reclamando a la direición que caltenga la llista salida de les primaries, incluyíu Jorge Fernández Iglesias, númberu 4, que quedaría fuera al ser ún de los sancionaos por Podemos.

Na semeya, Elipe, Tomé y Tuero ayeri en Xixón na movilización vecinal contra la planta de producción de biolíquidu a partir del reciclaxe de plásticos que se quier instalar n'El Musel.