Podemos insiste sobre l'estáu d'execución de proyeutos con cargu a fondos mineros

"Esmoleznos el riesgu real de perda de parte d'ellos como consecuencia del incumplimientu de los plazos fixaos nos convenios por parte del Gobiernu", señalen.

Depués de facelo en marzu, ensin algamar respuesta por parte del Executivu presidíu por Javier Fernández, Podemos insiste nel estáu d'execución de los proyeutos con cargu a los fondos mineros presupuestaos nes cuentes d'Asturies d'esti 2019 col mieu a un posible incumplimentu de los plazos marcaos nos convenios cola Alministración estatal. La vocera de formación morada de la Xunta Xeneral, Lorena Gil, acusa al Gobiernu de falta de coordinación, planificación y control, y apunta que "Adrián Barbón pue siguir buscando escuses fuera, pero haría bien n'asumir d'una vegada la responsabilidad del Executivu asturianu en xeneral, y nesta situación en particular".

En concreto, Podemos solicita los datos del conveniu regulador nel que s'enmarquen los proyeutos de fondos mineros aprobaos p'Asturies y de los actos adoptaos pol Gobiernu d'Asturies y l'Alministración del Estáu n'aplicación de dichos convenios. Tamién los datos concretos sobre la execución de cada proyeutu (procedimientu alministrativu emplegáu pa la so execución, presupuestu, feches d'aprobación, espublización, axudicación…) y l'aplicación presupuestaria na que se conseña caún, y númberu identificativu de tolos documentos contables rexistraos nel Sistema de Contabilidá del Principáu d'Asturies Asturcón XXI.

Na semeya, Barbón y Gil.