Piñán solicita a Rodríguez Uribes que los creadores n’asturianu opten a premios y subvenciones del ministeriu

La conseyera de Cultura, Política Llingüística y Turismu, Berta Piñán, aconceyó en Madrid col ministru de Cultura y Deporte, José Manuel Rodríguez Uribes. Ente otres cuestiones, la escritora solicitó que los creadores n’asturianu puedan optar a premios y subvenciones del ministeriu, asina como una presencia meyor nes sos actividaes.

Nun ye descubrimientu nengún que la falta d’oficialidá dexa fuera al idioma en munches cuestiones a nivel estatal. Tamién a les persones qu’usen l’asturianu na so xera creativa no que se refier a concursos, convocatories y actividaes desendolcaes dende’l ministeriu.

En munchos casos trátase d’una cuestión de voluntá. Ye lo qu’asocede nos ‘Premios Nacionales’ lliterarios, onde representantes de dellos coleutivos y los premiaos l’añu anterior pueden proponer trabayos pa la so categoría y nomes pal ‘Premio Nacional de las Letras Españolas’, que valoren “el conxuntu de la obra lliteraria d’una autora o autor español, escrita en cualquiera de les llingües españoles, con una obra que tea considerada como parte integrante del conxuntu de la lliteratura española actual”, según marca la convocatoria del 2020.

En nengún momentu fala de llingües oficiales. Pero, ¿qué asocede? L’Academia de la Llingua Asturiana ye la única de les academies que nun cuenta con representante nel xuráu que propón candidatos en tolos gallardones lliterarios, dalgo que sí pueden facer la Real Academia Española, la Real Academia Galega, Euskaltzaindia y l’Institut d’Estudis Catalans, y que dificulta enforma, por nun dicir qu’imposibilita, la presencia d’autores n’asturianu ente los aspirantes.

Esta situación camudó na convocatoria última, la del 2020, pola presencia de Xaime Martínez, ganador del 'Premio Nacional de Poesía Joven Miguel Hernández' del 2019 con ‘Cuerpos perdidos en las morgues. Una novela de detectives' (Ultramarino, 2018), que confirmó a Asturies.com qu’ente los 3 nomes que propunxo hebo autores en llingua asturiana. Sicasí, nengún de les sos propuestes pasaron el primer corte.

El pidimientu

Nel alcuentru entre Piñán y Rodríguez Uribes la conseyera solicitó que los ceadores en llingua asturiana pudieran optar a les convocatories de premios y subvenciones del ministeriu, mesmo qu’una una mayor presencia d'estos nes actividaes y programes que pongan en marcha. Mientres llega la esperada oficialidá qu’iguaría toes estes torgues qu’atopen los autores, paez claro que con voluntá se podríen solucionar munches cuestiones como’l de los ‘Premios Nacionales’ lliterarios.

Na semeya, Piñán esta mañana na inauguración de la esposición '33 obres maestres del arte español. La donación de Plácido Arango Arias al Muséu de Belles Artes d'Asturies'.