Pilar Sánchez Vicente asoleya la novela histórica 'Madrebona'

Tien programaes 7 presentaciones n'Asturies esti mes y una octava en Madrid en xunu d'esta obra en castellanu que coneuta'l Mediterraneu cola sablera asturiana que da nome al llibru.

'Madrebona' (Roca Editorial) ye la última historia de Pilar Sánchez Vicente, una novela histórica. Ésta desendólcase nel 4.500 enantes de la nuesa era, con Ekro, un mozu d'un pobláu de Kretis (Creta) arrasáu por "los adoradores de Baal", como protagonista.

Pierde nesi momentu al so padre y al so hermanu y escapa xunto a la so ma, que tamién finaría poco depués, entamando Ekro un viaxe pel Mediterraneu nel que conocerá nueves cultures y deprenderá a navegar siguiendo les estrelles. Un saltu temporal na narración presentarálu n'edá avanzada n'Iberia, onde ascenderá pel 'Gran Río' (Ebro) en direición a Madrebona, asitiada nel actual conceyu de Carreño.

El llibru ta encabezáu por un mapa del Mediterraneu na dómina na que se desendolca la historia y un nomenclátor que sirve d'allugamientu pa entamar cola llectura. Na introducción l'autora tamién ufre datos imprescindibles pa entender meyor en qué momentu tien llugar el viaxe d'Ekro.

La primera, en Xixón

Mañana'l xixonés Centru de Cultura Antiguu Institutu va acoyer la primer presentación de 'Madrebona', actu que va tar presentáu por Alicia Álvarez a les 19 hores. David Varela va poner música en direuto y Herminia Morís, pintura, y y con cada llibru va entregase un saquín con romeru de Creta.

La siguiente cita va ser el miércoles n'Uviéu, nel Muséu Arqueolóxicu d'Asturies, a les 19 hores, y va consistir nun alderique con María Antonia Pedregal y Sofía Díaz Rodríguez. Lo musica va correr a cargu nesta ocasión de Leticia Baselgas y va poder visitase una esposición de picos asturienses.

Completen el llistáu de presentaciones de 'Madrebona' n'Asturies la programaes en Cangas del Narcea (xueves a les 17 hores na 'Semana del Libro' de la Librería Treito), Navelgas (día 12), Avilés (15) y Mieres (17), asina como una firma de llibros en 'LibrOviedo' el vienres viniente. Mentes, Sánchez Vicente va tar en Madrid el 6 de xunu pa dar a conocer la so obra nueva.