Piésllense los IX Alcuentros Llingua Minoritaria y Educación

La IX edición de los Alcuentros, una iniciativa de l'Academia de la Llingua xunto cola Alministración Educativa que yá se ta convirtiendo nun clásicu pal mundu del profesoráu d'asturianu, tomaron tres díes de conferencies dende'l miércoles hasta güei.

El primer día, el públicu recibió la bona noticia de la edición d'una Historia de la Lliteratura Asturiana a cargu de Miguel ramos Corrada, profesor de la UNED y miembru de l'Academia.
Depués d'una interesante comunicación d'Urbano Rodríguez sobre les posibilidaes d'emplegu vehicular del nuestru idioma nos centros de Primaria, la xornada pesllóse con una conferencia de dos profesores de la Universidá de Lleida que, nuna sala atacada de públicu, falaron de la esperiencia multillingüe nel Vall d'Arán, un territoriu formalmente trillingüe. Les implicaciones de la esperiencia aranesa pal casu asturianu y especialmente pal gallego-asturiano, fixeron que'l públicu presente los tuviera requiriendo con preguntes hasta mui bien tarde.
Ayeri xueves la xornada abrió con una conferencia de Fernando Cuetos sobre l'aplicación pal aprendizax de la llinfua asturiana de los conocimientos de los procesos psicolóxicos del aprendizaxe de la llectura y acabaron con una conferencia de Josetxu Madariaga, de la Universidá del País Vascu que trató de la dimensión actitudinal de les esperiencies educatives billingües.Güei los actos céntrense en dos conferencies y una comunicación: A les 6 de la tarde Daniel Cassany, de la Universidá Pompeu Fabra pronuncia la primer conferencia alredor del "comentariu de testos"; de 7 a 7.30 l'académicu Xosé Inaciu Fonseca, bien conocíu tamién pol so trabayu musical con neños va falar de les rellaciones ente l'aprendizaxe de la tradición musical y la llingua. El día y con elli esti IX Alcuentru remata con una conferencia de José Romay de la Universidá d'Acoruña sobre les implicaciones educatives de la llingua materna y el sentimientu d'identidá.