Pieslle en negativo de les bolses

Permala selmana nos mercaos bursátiles onde los inversores refugaron el riesgu. Los malos resultaos empresariales tiraron p´abaxo per un mercáu debilitáu dende va dellesselmanes. Les duldes macroeconómiques tampoco nun ayudaron, y los principales índices bursátiles tuvieron una selmana con baxes. De fechu ye la primer selmana con cayíes nes bolses dende´l entamu d'esti ochobre, 74 cabudañu del crack del 29.



Al final de la selmana pasada les estadístiques más señeres teníen nome européu, casu de la cayida de los precios d´importación d´Alemaña, que baxaron un 0,2%, penriba les previsiones. Otramiente, el resultáu de cuenta corriente na UE foi un positivu de 5.000 millones d´euros. Na Gran Bretaña'l PIB medró un 0,6%, na llínia según los economistes. Tamién nes Islles Britániques les ventes minoristes xubieron un 0,6% cuando contaben namás con un 0,4%. Namás l'Estáu Español quedó fuera de la fola de bonos datos col probetayu resultáu de la EPA, que punxo la tasa de desemplegu nel 11,17%. En resume, según el bancu emisor europeu (BCE) el 2.004 va ser un añu de recuperanza económica pal Vieyu Continente.



Sicasí, les bolses europees pesllaron a la baxa, y en Wall Street nun foi meyor. Les empreses tecnolóxiques dieron anuncia d´unos febles resultaos y a dellos entro-yos medrana énte la posibilidá de que se perdieren los beneficios bursátiles del añu. Mala traza presenta Microsoft, que llegó a baxar más d´un 7%. Xunta la compañía de Bill Gates trancaron en perdes Gateway, Lucent y Scientific-Atlanta. L´índiz Dow Jones Industrial remató la selmana en 9.582,46 puntos (-0,32%) mentantu que´l tecnolóxicu Nasdaq baxó'l 1,06% hasta los 1.028,91 puntos.

El mercáu madrilanu tuvo una selmana de tendencia baxista con pocu volume de negociu negociándose'l vienres namás que 1.600 millones d´euros y pesllando l'l´Ibex-35 en 6.869 puntos. Nel conxuntu de la selmana l'Ibex tuvo unes perdes del 1,78%. Les duldes de Wall Street emburriaron p´abaxo a la Bolsa de Madrid onde los blue chips del parqué tuvieron delles perdes. Mapfre foi'l valor más dañáu el vienres al baxar un 2,62%. A la contra l´aerollínia Iberia foi el meyor valor con una xuba del 2,66%. Los sindicatos d´Iberia dieron anuncia de la posibilidá d´ampliar el Espediente de Regulación d´Empléu que ya lleva tiempu na compañía. Tamién tuvo bon pieslle NH Hoteles dempués de presentar resultaos. Ente les perdes destacaron Acciona y Unión Fenosa. Los bancos y el Telefónica nun tuvieron bona selmana.

Ente les materies, xuba del preciu del petróleu, que quedó penriba los 29 dólares-barril. Un inviernu fríu nos Estos Xuníos xunta'l posible pieslle d´una refinería de Conocco Phillips emburriaron el preciu del oru prieto. Estabilidá nel mercáu de renta fixo onde´l bonu del Estáu Español a 10 años tien una rentabilidá del 4,268%. Otramiente, l´euru sigue col so particular rally alcista y ya val 1,1840 dólares. La moneda europea allégase a másimos históricos mentantu'l dólar nun ye a recuperar tarrén. El casu ye qu'un euru tan caru daña les esportaciones europees y les empreses del Vieyu Continente ya lleven tiempu acusando nos balances la fuercia de la moneda común.