"Pieces" un DVD de regalu na Selmana de les Lletres

"Güor" de Javier Maqua y de "De la vida de les piedres" de Ramón Lluis Bande son les dos obres teatrales curties inxertes nel DVD "Pieces" editáu pola TV autonómica asturiana con motivu de la XXVII Selmana de les Lletres y que se presentó ayeri. El DVD va regalase al mercar daqué llibru n'asturianu esti vienres 5, Día del Llibru y el discu n'Asturianu.

A la presentación del DVD coles obres teatrales, que se grabaron a costafecha pa la so edición en videu nel teatru Palacio Valdés d'Avilés asistieron el director del Ente asturianu de Radiotelevisión José Ramón Pérez Ornia y el director de Promoción Cultural y Política Llingüística Carlos Madera, que tuvo palabres d'aliendu pa cola presencia del asturianu nos medios de comunicación y concretamente nel Énte Públicu, titular de la TV autonómica, qu'aseguró que va sofitar la creación n'asturianu, anque ensin concretar como va ser esi sofitu.

Amás d'estes dos obres de teatru, basada la de Maqua nuna reflexón sobre la Guerra d'Iraq y la de Bande na obra de la escritora Marguerite Durás, el DVD inxerta tamién el montaxe "Cinco poemes" rodáu pa la Selmana de les Lletres 2005 y pal que cinco directores adaptaron a imáxenes otros tantos poemes d'estremaos autores.