Piden que s'anule l'alxudicación de la obra del Meicín

Anque la Comisión d'Ordenamientu del Territoriu d'Asturies dio informe en negativo sobre'l proyectu d'ampliación del refuxu del Meicín en Penubina (L.lena) el Gobiernu asturianu contaba con poder sacar alantre la obra, que yá taba alxudicada primero de pasar pel tribunal de la CUOTA.

En rempuesta a esa alxudicación, la Coordinadora Ecoloxista d´Asturies ta acabante de pidir a la Conseyería de Cultura, de la que depende'l proyectu, que declare la nulidá de la resolución pola que s'alxudica la obra, pa lo que s'enconten nel artículu 102 de la Llei 30/1992, de Réxime Xurídicu de les Alministraciones Públiques y del Procedimientu Alministrativu y na llei 2/1995, de Réxime Xurídicu del Principáu d'Asturies, que se refieren a la suspensión de procedimientos yá entamaos. D'otra manera, la Coordinadora tamién fai referencia al determín de la CUOTA, qu'apautó que la obra diba contra les normes urbanístiques del conceyu de L.lena y suponía un "Usu Prohibíu" y entiende que de siguir aporfiando l'executivu asturianu en sacar alantre'l proyectu, ello podría ser constitutivo d'infracción penal.