Piden que nun se construya nes sableres de L'Espartal

El Grupu Ecoloxista d'Avilés presentó esta selmana alegaciones énte'l Conceyu de Castrillón contra los proyectos d'urbanización que tan previstos nes sableres de L'Espartal, llugar d'especial protección ambiental reconocíu nel Plan d'Ordenación de los Recursos Naturales (PORNA) y qu'atiesta coles urbanizaciones de gran altura que se fexeron nos años 70 en Salinas.

Nel escritu, los ecoloxistes acusen al Conceyu de Casatrillón de combayar "igual que va venti años" colos intereses especulativos y particulares nel espaciu de L'Espartal, en contra de protexer y defender esti espaciu natural y el so disfrute públicu. Según los ecoloxistes l'actuación urbanística prevista na Unidá d'Actuación S-8 va atacar el sistema de dunes de les sableres de L'Espartal, y ello con consentimientu llegal. Ello ye que nel so día les dunes de L'Espartal enxertáronse dientro del dominiu públicu marítimu-terrestre, una categoría que lu resguardaba de cualquier actuación urbanística.

Un recursu contenciosu-alministrativu que presentare nel so día Asturiana de Zinc, que tien la so fábrica atiestando tamién con L'Espartal llevó a que se descatalogaren parte d'estos terrenos, quedando nuna situación de vacíu llegal que ye la que permite que'l Conceyu de Casatrillón se plantegue'l dar de pasu esta urbanización. De cualquier manera, los ecoloxistes afirmen que los terrenos onde se quier construyir entren por llei dientro de la zona de Servidume de Protección del Mar, onde, ente otres prohibiciones, apáutase la d'edificación de residencia. Los ecoloxistes faen referencia a otres lleis como'l Decretu 107/1993 qu'apauta la "Zona de Protección Específica", una faza de 100 metros que cuenten dende la zona de Servidume de Protección y onde esiste la mesma prohibición d'edificar.

Los ecoloxistes llamenten que, en tolos escritos que-y van mandando hasta agora al Conceyu de Castrillón, ésti respuende que'l Monumentu Natural de L'Espartal "entovía nun cuenta col decretu preceptivu que lu declare como tal" dalgo que pal grupu conservacionista avilesín nun ha contradecise col reconocimientu d'esta categoría que-y otorga efectivamente'l PORNA.