Piden más vuelos baratos

La Plataforma Pro Vuelos Baratos n'Asturies metió pel rexistru de presidencia un escritu empobináu diréctamente a la persona de Vicente Álvarez Areces nel que reclamen que sigan les negociaciones pa traer a Asturies más vuelos a baxu coste dempués de que l'executivu asturianu presentare a primeros d'esti mes de febreru l'alcuerdu con Easyjet que va pobner un enllace diariu col aeropuertu de Londres-Stansted

La plataforma ciudadana pide qu'amás de concretase l'enllace con Berlín que s'anunciare na presentación del alcuerdu con Easyjet se faigan tamién conexones con Roma, París o Bruseles ente otres capitales europees, y reclama que les tarifes baxes lleguen tamién a los destinos n'aeropuertos españoles, faciendo un llamáu a la "fin de los monopolios" en cuantes que "l'apertura d'enllaces va abrir mercáu, meyorar la competencia y beneficiar al ciudadanu".

L'anuncia de la plataforma coincide cola de Easyjet, qu'esplicó que lleva vendíes trés cuartes partes del pasaxe del vuelu inaugural de l'enllace Asturies-Londres, que va salir el prósimu día 24 de marzu del aeropuertu de Ranón. Pa montar nel avión inglés en díes socesivos la cosa ta tamién complicada, y ello ye que dende que s'anunciare na web d'Easyjet la entrada en serviciu de la llinia yá se lleven despachaos más de 3.100 billetes, ello teniendo en cuenta que la empresa entovía nun dispón d'oficina n'Asturies y que toles ventes foron esclusivamente al traviés d'internet