Piden más vixilancia en Muniel.los

La Coordinadora Ecoloxista d'Asturies atalanta qu'esiste un clima de tensión alredor de la reserva de Muniel.los partir de les declaraciones cruzaes ente'l presidente del PP de Cangas del Narcea Manuel Rodríguez Blanco, representante políticu que se mostró siempre contrariu a la declaración del Parque Natural y qu'echó nun de los últimos plenos del conceyu contra'l llabor de los guardes y bomberos qu'atendieron el fueu qu'el pasáu mes d'ochobre quemó más de 300 hectárees de viesca autóctono nel espaciu natural, incluyendo carbayos centenarios. Según Rodríguez Blanco, los bomberos taben faltos de preparación y dexaron qu'el fueu quemare más superficie de lo que debiere. Pela so parte, l'alcalde de Cangas, asitió a los autores del fueu na redolada del PP y la oposición al parque, y declaró que Rodríguez Blanco "sabe más de lo que diz sobre'l fueu"

Énte esti cruce de declaraciones, el grupu conservacionista ve qu'esiste un clima tensu alredor de Muiniel.los y diz tener mieu de qu'esti tipu d'episodios vayan repetise nel futuru, y precisamente por ello sorrayen el fechu de que la Conseyería de Mediu Ambiente nun tien un dispositivu curiosu de vixilancia na Reserva de Muniel.los, polo que "tan esponiéndose a qu'ocurra otru desastre ecolóxicu por falta d'una vixilancia qu'espante a posibles delincuentes". Los ecoloxistes llamen l'atención sobre la condición de Muniel.los como "símbolu nes polítiques de conservación de la naturaleza y de protección d'espacios naturales, lo que fai que cualquier acción que se faiga nelli automáticamente actúe como caxa de resonancia, lo que la convierte nun blancu perfectu y vulnerable enforma si nun s'estremen les midíes de vixilancia y control".

La Coordinadora diz que nun tan plantegando nada escepcional en cuantes que la Reserva de Muniel.los contó siempre con un dispositivu específicu de vixilancia formáu por un Guarda Mayor y tres Guardes Rurales más, siendo asina hasta qu'a mediaos de la llexislatura pasada suprimióse'l serviciu, treslladando a esti personal a facer otru tipu de llabores n'otres partes del conceyu, mayormente peritaxes de los daños del xabalín y acompañamientu de cazadores nes batíes organizaes pola Conseyería de Mediu Ambiente.

La valoración que fai la Coordinadora d'esti destín que se-yos dio a los guardes ye negativa a la fuerza, y asina'l grupu diz que nun ve lóxico que se prioricen estes actividaes per delantre de les del cuidáu y vixilancia d'un espaciu d'altísimu valor ecolóxicu como ye la Reserva de la Biosfera de Muniel.los y reclamen que si se precisa de guardería p'atender la tasación de daños y les caceríes nel restu del conceyu lo que tendría de facese ye un aumentu de plantiya o mirar por adoptar otres soluciones que nun impliquen quitá-y efectivos a la Reserva. La Coordinadora remata esplicando que la vixilancia de la Reserva de Muniel.los vien esperimentando una mengua grave nos cuatro años últimos y diz qu'agora namás se faen servicios de guardia de xemes en cuando cuando anteriormente facíense de forma sistemática y organizada, siendo esta falta de control dalgo que se conoz nel conceyu, y que fai que "la minoría d'exaltaos qu'esisten" lo tenga más facil pa cometer actos vandálicos.