Piden aparar el proyectu pa facer un campu de golf en Truyés

El Colectivu Ecoloxista d'Aviles solicitó ayeri en rexistru del Ayuntamientu de Corvera qu'anule'l procedimientu del estudiu de la urbanización de Truyes, onde ta previsto construyir 600 viviendes y un campu de golf sobre una superficie expropiada de cerca de 1 millón de metros cuadraos. La solicitú al conceyu pide tamién que se detengan los movimientos de tierra y cualquier obra que tea faciéndose agora, casu de les que yá tan faciéndose pa construyir una vivienda pilotu de la futura urbanización ensin tar aprebáu el proyectu previu a la llicencia.

El grupu ecoloxista, que cree qu'estes obres tan faciéndose "col consentimientu del conceyu" pero ensin los permisos que se precisrn pa ello, diz que nel Estudiu de Detalle de la operación de Truyés que se punxo a información publico detéctense delles irregularidaes alministratives que xustifiquen la nulidá del procedimientu alministrativu del documentu. Ente estes faltes el Colectivu alcuentra la falta d'un estudiu de la Confederación Hidrográfica, en cuantes que'l proyectu afecta directamente a fontes y cursos d'agua, nin tampoco de la Dirección Xeneral de Carreteres, anque la urbanización tamién corta una carretera comarcal. Otru tanto pasa con una llinia d'alta tensión que pasa pel llugar y pa la que tampoco nun hai estudiu pertinente de Rede Eléctrica.

El Colectivu diz que se reserva'l derechu d'acudir a otres instancies en casu de que'l Conceyu nun mande parar les obres que tan faciéndose y dea de pasu tol espediente ensin iguar los fallos qu'atalanten nelli.

Aparte d'esta denuncia, nel pueblu de Truyés vien funcionando dende va meses una plataforma que, baxo'l nome de "La Foz del Pielgu" atropa toles voluntaes populares opuestes al proyectu de la urbanización y el campu de golf, que ta faciendo tamién un importante llabor. Ún de los sos movimientos más de recién foi'l d'intentar la másima catalogación patrimonial pa Truyés, cosa que nun foron a llograr al desestimar el Principáu la so propuesta. Énte ello, la plataforma ta agora nel trámite de conseguir catalogaciones parciales d'elementos del patrimoniu nel Ayuntamientu. Na so web pue facese un recorríu per tol patrimoniu de Truyés afectáu pola operación urbanística