Pidal Montes asoleya la so primer novela, ‘La vida esplicada’

La editorial noreñesa La Semeya, editora tamién de ‘El Periódicu’, mediu de comunicación llocal en papel y dixital, estrénase col llibru ‘La vida esplicada’, primer novela de Xosé I. Pidal Montes y segundu títulu n’asturianu del escritor de Bimenes. El yerbatu ta presentando la obra per Asturies, con parada esti miércoles en Xixón.

“La vida nun tien argumentu, y ante esa incontestable verdá, l’autor adiéntrase nel territoriu de la narrativa a traviés del invisible filu conductor de lo oyío, de lo lleío, de lo vivió; de l’acordanza de tantos nomes qu’hasta la memoria escaeció. Siempre buscando que quien llea esta vida esplicada caleye pela sienda que s’abre ente la niebla de la lleenda y la realidá”, apunten dende La Semeya.

Pidal Montes tenía espublizao hasta la fecha poesía, en total trés poemarios: ‘Nadie se Salva’ (Versos & Reversos), ‘Ensin bones referencies’ (Suburbia) y ‘Parabellum en flor’ (Best Books). Con ‘La vida esplicada’ atrévese cola narrativa, presentando una obra “rompedora na que'l so argumentu ye la propia novela”.

La presentación de Xixón va celebrase esta tarde a les 20 hores en La Buena Letra. L’autor va tar acompañáu por Toño Martínez y Marino Córdoba, de la editorial.

Na semeya, Martínez y Pidal Montes.