Petróleos Asturianos reduz el so proyectu pa El Musel énte les esixencies de los ecoloxistes

El ministeriu de Mediu Ambiente comunicó-yos a les organizaciones
Ecoloxistes asturianes que denunciaren el proyectu, que la empresa "Petróleos Asturianos" decidió abandonar el so proyectu p'almacenar 180.000
tonelaes de combustibles en puertu de El Musel pa evitar los problemes que tendría de resolver n'aplicación de la normativa sobre evaluación d'impactu ambiental.

Pa ello, la empresa participada pola asturiana Duro Felguera va facer unos tanques d'almacenamientu de gasoil y gasolina de menos de 100.000 tonelaes, acordies col proyectu que "Petróleos asturianos" presentare de mano pero que dempués aumentó hasta cuasi doblar la capacidá prevista. Grupos como la Coordinadora Ecoloxista Asturiana denunciaren que'l proyectu y les obres, que se taben llevando alantre en terrén ganáu a la mar, carecíen d'Evaluación d'Impactu Ambiental, lo que suponía una infracción tipificada como "mui grave". Ello ye que, al facer los tanques con capacidá pa menos de 100.000 tonelaes, la empresa llibra de tener que facer esta evaluación.


Los grupos ecoloxistes que denunciaren la obra afirmen qu'esti casu demuestra como "los procedimientos pa evaluar los impactos ambientales de los proyectos se
consideren un trámite alministrativu molestu que en nengún casu pon en cuestión decisiones yá tomaes". Los ecoloxistes llamenten igualmente que "tengan que ser organizaciones ciudadanes les que, con unos medios mui probes, se vean obligaes a facer los llabores de control que debieren facer les alministraciones". D'otra manera, sobre la obra de los tanques de gasolina pesa otra denuncia ecoloxista puesta nos tribunales y que se centra nel usu de materiales non autorizaos pa rellenar los cais onde tiene que dir los tanques.