Personalidaes del asturianismu cultural y social sofiten la candidatura de Xune Elipe con un manifiestu

|
Xune Elipe y Cova Tomé en Salas

Baxo’l lema ‘L’asturianismu a la Xunta Xeneral’, más de mediu centenar de personalidaes del asturianismu cultural y social sofitaron un manifiestu d’apoyu a Xune Elipe, escoyíu pola militancia de Podemos como’l númberu 2 de la llista eleutoral. L’avilesín agradez l’apoyu recibíu y comprométese a “que na próxima llexislatura s’abra de verdá’l procesu pa la reforma del Estatutu d’Autonomía”.

Etnógrafos, escritores, ecoloxistes, artistes, profesores universitarios, sindicalistes…, hasta cuasi 60 persones de perfiles y campos diferentes roblaron esti documentu, que nun fai referencia a nengún partíu políticu nin pide’l votu esplícitu, plantegándolu como un apoyu personal a Elipe y “a la conveniencia de qu’un perfil como’l suyu pueda tar presente na Xunta Xeneral”, espliquen los sos promotores. Trátase de “una mui bona muestra d’esti movimientu presente na sociedá asturiana asturiana dende la restauración democrática”, apunten al tiempu que rescamplen la presencia de “representantes del asturianismu históricu” nel llistáu de firmantes.

El manifiestu entama señalando que “les elecciones autonómiques del próximu 28 de mayu van ser cruciales pal futuru d’Asturies” polo retos a afrontar, siendo “ún de los principales” la reforma estatutaria. “Ye necesaria una etapa nueva que con visión de país afronte les xeres pendientes y les que tán por llegar”, destaquen.

Asina, “creemos qu’una voz asturianista ye más necesaria que nunca na coyuntura política nueva que va dase na próxima llexislatura; poro, un perfil como’l de Xune Elipe puede ser un revulsivu que dinamice y lleve esa sensibilidá a la Xunta Xeneral”. “Xune representa l’asturianismu históricu que foi quien a estructurar un movimientu social presente na cai dende la restauración democrática, a lo que xunta una visión progresista y abierta del mesmu, ensin dogmatismos y cola madurez precisa pa facer un bon llabor nes instituciones. Yá ye hora qu’esi sector de la sociedá tenga representación na máxima institución asturiana y aporte esa perspeutiva global y consciente del país que necesitamos p’avanzar”, fina.

Ente los firmantes apaecen nomes como los de Lourdes Álvarez, Xuacu Amieva, Xosé Antón Fernández ‘Ambás’, Taresa Lorences, Lisardo Lombardía, David M. Rivas, Cheni Uría, Rubén Vega, Ignaciu Llope, Consuelo Ríu, Carlos Lastra, José Manuel Tejedor, Silvia Quesada, Aitor García Corte, Ramón Blanco, Faustino Zapico, Francisco Javier García Valledor, Adolfo Camilo Díaz, Nieves González o Llorián García. Elipe agradez esti sofitu y comprométese a “que na próxima llexislatura s’abra de verdá’l procesu pa la reforma del Estatutu d’Autonomía y convierta esti testu una ferramienta amañosa de desarrollu y profresu de tola sociedá asturiana, que blinde derechos sociales y llogre otros como los llingüísticos al traviés de la oficialidá”.

Presiones dende Madrid

Otra manera, el vienres, el de Villalegre denunció presiones por parte de dos trabayadores dependientes de la Secretaría d’Organización estatal de Podemos, desplazaes a Asturies pa tratar de face-y un “interrogatoriu”, esplicó’l númberu 2 de la llista, lo que considera “inaceptable y mui preocupante”. Al empar témese l'apertura d'un espediente, una situación asemeyada a la que tán viviendo otros compañeros y que llevó a cuasi cien militantes y inscritos de Podemos n’Avilés y Corvera a apoyar a Cova Tomé y Elipe, a esixir el fin de les espulsiones nel partíu, un conceyu ciudadanu y el respetu íntegru a la candidatura.

Na semeya, Elipe, a la izquierda xunto a Tomé a la entrada al centru de salú de Salas, nun alcuentru celebráu'l sábadu colos vecinos pa tratar sobre la situación de l'atención primaria nel conceyu.

Contador Estadistiques