Perlora va acoyer l’actu políticu de Compromisu por Asturies pal Día de la Nación Asturiana

El Llagar del Restaurante Casona El Carmen, en Perlora, ye’l sitiu escoyíu por Compromisu por Asturies pa celebrar el Día de la Nación Asturiana. Un actu políticu va abrir la xornada, pa continuar depués con una espicha.

Yolanda Huergo, vocera de Compromisu por Asturies, y Roberto Holgado, conceyal d’Unidá Nacionalista Asturiana (UNA)-Bloque por Asturies de Carreño, van ser les dos persones que van intervenir nel actu políticu, previstu pa les 12.30 hores. Tres los dos discursos, alredor de les 14 hores, va tener llugar la espicha, abierta pa tolos asistentes a un preciu económicu. Los interesaos en quedase a la xinta han de contautar cola organización al traviés de la so web o de les redes sociales.

Otra manera, el Gobiernu anunció les actividaes programaes pal sábadu en Tinéu para celebrar el ‘Día d’Asturies’. Éstes van principiar al meudía cola apertura d’un mercáu tradicional, xuegos infantiles y una amuesa de deportes tradicionales, ente otros. A les 12.30 hores va haber un conciertu de tonada entamáu pola Asociación de la Canción y el Folklore Valle del Nalón y l’Asociación d’Interpretes de la Canción Asturiana (AICA), y yá de tarde-nueche, la música va siguir teniendo protagonismu coles actuaciones de Distrito 48 (18 hores), Roke (19.15 hores), Rafa Lorenzo (20.30 hores), Asturiana Mining Company (21.45 hores) y Doctor Explosion (23 hores).

Na semeya, Huergo na so intervención nel Día de la Nación Asturiana del añu pasáu celebráu por Bloque-UNA en La Pola Ḷḷena.