Periodistes pol Asturianu toma parte nel debate sobre l'asturianu na TV autonómica

L'asociación Periodistes pol Asturianu va presentar el sábadu 19 nel Muséu de Belles Artes d'Asturies les "Bases pal tratamientu de la llingua asturiana nel Ente de Comunicación del Principáu". Trátase d'un documentu de 15 puntos nel que los miembros de l'asociación proponen una serie de principios polos qu'entienden qu'ha mandase la presencia del asturianu na futura Radio-Televisión Asturiana.

A Periodistes pol Asturianu paeció-y necesaria la ellaboración d'esta propuesta dada la situación socio-llingüística que vive Asturies y la inminente puesta en marcha del Ente de Comunicación del Principáu.

L'actu va sirvir tamién pa presentar la nueva xunta directiva de Periodistes pol Asturianu y los proyectos de l'asociación. El coleutivu, que lleva diez años de funcionamientu, decidió fai unos meses dar un pasu más y constituyise llegalmente como Asociación Cultural baxo'l mesmu nome "Periodistes pol Asturianu".