Periodistes pol asturianu reclámen-y seriedá cola llingua asturiana a Pérez Ornia

Énte l'anunciu del director del Ente Públicu de Comunicación, José Ramón Pérez Ornia, de que la llingua asturiana va ser una cuestión que se va valorar como "elementu cultural" más nes pruebes de selección del personal, Periodistes pol Asturianu asoleyó ayeri un comunicáu de prensa nel qu'espresa la so disconformidá énte unos criterios que considera que nun dan garantia nenguna pa que la llingua asturiana tenga una presencia mínima nesti mediu de comunicación públicu.


Les declaraciones d'Ornia, qu'equiparen el reconocimientu que va tener el dominiu de la llingua asturiana, col del inglés nes pruebes de selección abúlten-y a esti colectivu "incomprensibles y fuera de llugar nuna comunidá billingüe". Periodistes pol Asturianu remembra al respective un garapiellu de referencies llegales ente les que cita l'Estatutu d'Autonomía, la Llei d'Usu del asturianu, el Plan de Normalización y la mesma Llei del Ente de Comunicación, qu'apauta ente los sos principios d'actuación la "promoción de la cultura y la educación, con especial protección al bable, pente la promoción del so usu y difusión nos medios de comunicación social" .

Especial gravedá tienen pa Periodistes pol Asturianu les pallabres d'Ornia cuando diz que nun se van mirar cuestiones de gramática o sintaxis del asturianu a la hora de facer les prebes d'accesu a los profesionales que trabayen nel ente. L'asociación diz qu'ello pue llevar a que se conforme una plantiya na que naide tenga capacitación pa escribir o falar n'asturianu, colo que la programación n'asturianu tendría de subcontratase y l'asturianu nun tendría cabida nel trabayu básicu y diariu del Ente. D'otra manera, Periodistes pol Asturianu dicen que nun tien sentíu qu'Ornia equipare'l conocimientu del asturianu col del inglés, nun siendo nel casu más bien estrañu de que l'inglés tuviera n'Asturies "especial protección". En cuenta d'ello pa l'asociación ye preciso apautar unos mínimos que garanticen que la plantiya de la TV autonómica cuente con recursos humanos que dominen l'asturianu y les situaciones comunicatives nesta llingua.

Finalmente, Periodistes pol Asturianu llamenta que la excepcionalidá llingüística que se vive n'Asturies vuelva a ponese de manifiestu nesti procesu de creación de la TV Autonómica al ser Asturies la única comunidá billingüe del Estáu na que va crease un mediu de comunicación que va inorar l'idioma propiu, mentes que nel restu de les comunidaes ún de los fines principales colos que nacieron estos medios foi, precisamente, recuperar, normalizar y dignificar la llingua propia. El colectivu de periodistes llamenta que l'asturianu sigue ensin tomase en serio y recibe'l tratamientu propiu d'un adornu folclóricu por parte de los responsables de la TV autonómica.