Periodistes pol Asturianu entama una nueva etapa

Na mañana d'esti sábadu 19 "Periodistes pol
Asturianu" entamó una rueda de prensa p'anunciar una nueva
etapa , amás de presentar una propuesta de bases pal tratamientu del
asturianu nel ente de comunicación del Principáu.



Beatriz Viado y Naciu Varillas, presidenta y vicepresidente
respectivamente de Periodistes pol Asturianu, presentaron nel salón del
"Museo de Bellas Artes" d'Uviéu una nueva cara d'esta
asociación profesional. Nesti sentíu Beatriz Viado comentó
que "ábrese una nueva etapa na asociación, que tien
por oxetivo convertise n'interlocutor válidu de los periodistes
n'asturianu". D'esta manera Viado lleó los oxetivos
estatutarios de l'asociación, que con motivu d'esta nueva etapa de
trabayu decidió llegalizase como asociación. Los oxetivos
principales del 'asociación son "afalar y promover l'usu del
asturianu nos medios de comunicación asturianos, asina como cuidar de
que'l so usu se faiga d'una manera digna y con oxetivu
normalizador".



En base a esta filosofía l'asociación presentó unes
"Bases pal tratamientu de la Llingua Asturiana nel ente de
comunicación del Principáu". Sobre elles Naciu Varrillas
fizo destacar que "nun falamos de porcentaxes respecto del
castellanu, sinón que preferimos establecer una serie de principios que
tienen que se mantener nos trés medios del nuevu ente,
televisión, radio y periódicu dixital, pero tamién nes sos
comunicaciones internes y esternes". Ello ye que'l documentu
apuesta por caltener un principiu de discriminación positiva,
sobremanera no que cinca a programes informativos, deportivos y infantiles. El
documentu tamién reclama la non especialización de la
programación onde l'asturianu tea presente. Les bases nun s'escaecen
tampoco del respetu a les variantes del asturianu, asina como pal
gallego-asturianu, o de desixir l'usu de la forma autoctona de los
topónimos.



L'últimu puntu de les bases proponen la creación d'un
"Conseyu Llingüísticu" permanente, onde intervengan la
Oficina de Política Llingüística, l'Academia de la Llingua
Asturiana y la Universidá d'Uviéu, amás d'una
representación profesional de los periodistes.