Pérez posiciónase contra la oficialidá, que cree "contraproducente"

Defende apoyar el conocimientu del idioma.

Nuna entrevista concedida a 'La Voz de Asturias', José María Pérez López, candidatu a secretariu xeneral de la Federación Socialista Asturiana (FSA), posicionóse contra la oficialidá de la llingua asturiana y gallego-asturiano: "Yo nun creo necesario, nesti momentu, la cooficialidá y inclusive creo que podría resultar contraproducente". "Creo que ye importante apoyar el conocimientu de la llingua asturiana, ye importante que busquemos aquelles víes que puedan ayudar a ameyorar lo que se ta faciendo nesti momentu", afirmaba previamente.

Sobre la propuesta de la plataforma 'Socialistes pola Oficialidá', con simpatizantes de la so candidatura, que ta acabante de presentar una enmienda a la ponencia marcu del congresu de la FSA pa llevar l'alderique de la oficialidá al mesmu, apuntó que será la militancia la que decida sobre l'asuntu, anque dexó bien nidio que la postura que va defender va ser la contraria. Mentes, entrugáu al rodiu la plurinacionalidá qu'agora defende'l PSOE y si Asturies ye nación, Pérez López nun se moyó y afirmó que "nun ye un problema identitariu, ye un problema d'igualdá, de tener les mesmes oportunidaes y derechos ente les persones".

L'otru candidatu, Adrián Barbón, entovía nun confirmó cuála ye la so postura al respeuto de la oficialidá, anque sí s'amosó favoratible a abrir un alderique al respeuto.

Na semeya, Pérez López a la izquierda mientres el debate con Barbón, qu'abrió la campaña.