Pérez Ornia toma’l cargu del ente de comunicación

José Ramón Perez Ornia yá ye presidente del ente de comunicación del Principáu. La toma de posesión celebróse nun actu nel RIDEA al qu'asistieron munchos de los personaxes más influyentes del periodismu y de la política asturianos. El presidente del Principáu Vicente Álvarez Areces, la conseyera de Cultura Ana Rosa Migoya, el Director de Comunicación y Proyectos Culturales Jorge Fernández León, representantes del Conseyu de la TV como Juan Cueto y otros munchos directivos de medios de comunicación particulares d'Asturies tuvieron presentes nun actu de repercusión mediática mui superior a la media.

El yá presidente del ente defendió una TV "independiente y plural" atacando directamente a la politización como ún de los males que dañen a toles canales públiques creaes hasta agora.
"Eficacia y tresparencia na xestión pa que nun resulte un cargu económicu", "que respuenda a les necesidaes y espectatives de los asturianos y consiguir qu'estos l'atalanten como dalgo útil" o "qu'impulse la creación d'un mercáu audiovisual propiu" foron dellos de los propósitos que fizo Perez Ornia na so presentación pública. Ensin facer mención esplícita de la presencia de la llingua asturiana nel ente, Ornia esplicó que'lconteníu de la TV "tien d'espeyar la realidá d'Asturies, la so historia, actuales manifestaciones culturales y artístiques, vida social y política y el so desarrollu industrial y tecnolóxicu"


En cuantes a la programación, Ornia apuntó que va encontase nos informativos, siempre entendiendo la TV como un mediu qu'ha respetar "valores cívicos, culturales y democráticos", mientres que per otra parte'l responsable de l'autonómica quixo quitá-y fierru a la competencia coles canales particulares, apuntando que "l'autonómica tien de sumase a los demás medios y non restá-yos espaciu" y que tien "voluntá de cooperar más que de competir".

La Pita de la Xunta Pola Defensa de la Llingua asistió al actu acompañada d'un bon garapiellu de miltantes de l'asociación, que recibieron a los participantes nel actu con pancartes pidiendo la oficialidá del asturianu y la presencia del asturianu como llingua de la futura TV asturiana. N'acabando l'actu, les fuerces de seguridá procedieron a identificar a los militantes de la Xunta.