Perez Ornia diz que l'asturianu va tener faza horaria acutada na radio autonómica

El director de la Radio Televisión del Principáu d'Asturies (RTPA), José Ramón Perez Ornia, compareció ayeri na Xunta Xeneral del Principáu a solicitú del PP p'aclariar el llabor que se lleva fecho hasta agora na puesta en marcha de la TV autonómica y los proyectos y presupuestos del ente pa esti añu 2006.

La presencia que vaya tener l'asturianu nes emisiones de la TV sigue ensin conocese tres d'esta apaición de Perez Ornia. El responsable del ente sí qu'adelantó que la llingua asturiana va tener una faza horaria propia acutada nes emisiones de la canal de radio autonómica y que "va haber" programes n'asturianu na TV, pero nun afondó en más detalles sobre cuáles diben ser eses faces horaries o qué temática diben tratar los futuros programes n'asturianu del ente.

No tocante a la programación de la TV Ornia afondó énte los parllamentarios del PP en que la TV nun se plantega ser xeneralista y que l'oxetivu ye'l de crear una "canal temática d'Asturies" con conteníos d'información, actualidá, deportes el fin de selmana y actos culturales d'Asturies de manera qu'al traviés d'ella pueda vese "la realidá d'asturies ensin falta de recurrir a otres canales" col oxetivu amestáu de que la RTPA emita via satélite pa la comunidá emigrante. Dientro d'esta voluntá de sirvir de canal temática, Ornia aclarió que la radio, que va echar a andar pa la seronda d'esti 2006, va facer un llabor de promoción de la música del país, acutando'l 30% de les sos emisiones musicales pal llabor de músicos radicaos n'Asturies.

Otra de les novedaes de la comparecencia d'Ornia foron les anuncies que dio sobre'l periódicu dixital del ente, que va contar con un presupuestu de 48.000 euros y que va tener a la universidá d'Uviéu de webmaster. La principal novedá que se dio a saber sobre esti portal ye qu'al traviés del mesmu va apurrise en "streaming" la emisión de la tv y radio autonómiques.


El director de la TV autonómica fizo un balance en positivo del so llabor de xestor y calificó de "histórico" el que la RTPA fuere la TV que menos tardo n'emitir en prebes dende la so creación formal, un plazu de 10 meses y 11 díes dende qu'elli garrare'l cargu. Dende l'entamu de la emisión en prebes, que foi'l pasáu 20 d'avientu, Ornia esplicó que se lleven emitíes "129 hores de programación de les que'l 40% de les mesmes foron de conteníu asturianu". El máximu responsable de la TV autonómica asturiana defendió tamién la tresparencia y llegalidá del procesu de contratación de personal, destacando que "namás hebo una impugnación al mesmu que presentó'l sindicatu CSI y que desestimó'l TSXA". Ornia apurrió datos sobre la contratación, apuntando que yera la primer vegada que se facía un sistema d'oposición publica anque los contrataos nun fueren tener estatus de funcionarios. Ente los datos qu'entesacó Perez Ornia rescamplen el que'l 72% de los contrataos son nacíos n'Asturies, siendo muyeres 6 de cada diez trabayadores del Ente y consiguiéndose una plantiya con una edá media de 35 años.


Con anunciar nel so día que la RTPA nun diba emitir fútbol de competición por considerase un gastu escesivu pa una TV que nacía con un presupuestu modestu, el fechu de que les primeres emisiones de la canal tuvieren por protagonista al deporte rei foi ún de los puntos de los que más se faló na comparecencia de Perez Ornia, que xustificó l'inxerimientu del fútbol na parrilla de programación como un elementu "decisivu" p'afalar el procesu d'antenización. Ornia declaró que'l preciu que se-y abonó a la FORTA polos derechos de tresmisión correspondientes a la media temporada de lliga foi de 1.294.000 euros. El preciu por temporada completa ye de 3 millones d'euros, anque Ornia adelantó que la FORTA tien de renegociar esta cantidá n'acabando la presente temporada. Otramiente, Ornia aclarió que los partíos de segunda división B que se retresmite fáense pagándo-y a una empresa productora a razón de 5.400 euros por partíu más otros 2.000 por derechos d'usu de satélite.

Ornia esmenuzó los costes del ingresu nel ente qu'axunta a les televisiones autonómiques, pal que la RTPA tien acutaos 3,7 millones d'euros nos sos presupuestos. La cuota por pertenecer a la FORTA, na que la RTPA entró formalmente'l 19 de xineru, supón un pagu añal de 325.000 euros que da accesu al serviciu de noticies nacionales y internacionales. Como cuota d'entrada, la RTPA ha pagar amás de la normal otres dos añalidaes estraordinaries de 800.000 euros, cifres a les qu'hai qu'amestar el paquete contratáu de cine, que cuesta 400.000 euros de cuota más una cantidá variable d'ente 1.000 y 2.000 euros per cinta.