Perdayuri Asturies

Anque fai venti años qu'empecipió la inclusión de l'asignatura de "llingua asturiana" nes escueles, solo 14.000 alumnos de primaria tienen la posibilidá d'estudiala y eso col sambenitu de la "voluntariedá", un eufemismu que sigue valiendo pa nun xeneralizar un derechu básicu y convertila nuna asignatura más. En secundaria les cifres son llamentables: 700 alumnos.
A pesar de too eso, la Viceconseyería d'Educación del Principáu, amás de nun ponese collorada, tien el valor de presentar esto como una muestra de la normalidá y de lo muncho que s'avanzó nestos años. Asina, Mar Madera, Xefa de Sección d'ensiñanza del asturianu dixo a los medios la selmana pasada, na presentación d'una campaña institucional que lleva'l títulu de "Perdayuri Asturies" que se tien avanzao muncho porque yá nun se considera que l'asturianu ye falar mal y que la voluntariedá garantiza que
"nun se meta la llingua con calzador".
Esta visión que convierte a la llingua asturiana nuna asignatura "especial" suxeta a ideoloxía o creencies, desque se pue escoyer o non na escuela, sigue viéndose nel diseñu d'esta campaña que se concreta en subvenciones a "fiestes" y caxigalines qu'afonden n'aspectos de la cultura asturiana nos que s'inclúi la llingua igual que les castañes del amagüestu o la construcción de madreñes. Nun hai duda de que dirán que la promoción del asturianu lleva munches perres.