Pepe Monteserín adapta la lleenda de San Xurde y el Dragón

L'escritor Pepe Monteserín presentó esta selmana "Ensin párpagos" obra asoleyada pola Academia de la Llingua Asturiana y que cuenta con ilustraciones d'Antonio Acebal. Empobinada a un públicu preferentemente infantil, "Ensin párpagos" recrea la lleenda clásica de San Xurde y el dragón.

El pravianu Pepe Monteserín ye ún de los autores asturianos contemporáneros más trabayadores. El llarguísimu catálogu de les sos publicaciones de narrativa en castellanu dende 1993, añu en que s'estrenó co "Mar de fondo" ta estráu de premios qu'incluyen el Nacional de Novela "Francisco Ayala" pola so novela Caballos de cartón, el Caja de España al meyor llibru de cuentos, o, más de recién, el premiu d'ensayu valencianu "Juan Gil-Albert" cola novela "La conferencia. El plagio sostenible".

Amás de rescamplar como autor en castellanu, Monteserín ye un autor al que-y presta espresase n'asturianu. Agora, y gracies tamién al enfotu del illustrador Antonio Acebal, Monteserín asoleya col sofitu de l'ALLA esti "Ensin párpagos" obra abierta a un públicu infantil y familiar que reconstruye la lleenda clásica de San Xurde y el dragón, tresformáu equí na so versión asturiana del cuélebre, y que l'autor presenta como una parábola sobre la busca del conocimientu y de cómo ésti acaba cegando al sabiu.