Pennec tuvo n’Asturies pa coordinar la direición artística d'un espectáculu pal Festival Interceltique de Lorient

El músicu bretón Alain Pennec tuvo esta selmana en Xixón xunto con David Varela pa coordinar la direición artística d’un espectáculu musical y visual pal Festival Interceltique de Lorient. El certame ta dedicáu nesta edición a Asturies.

El Grand Theatre d’An Oriant/Lorient va acoyer el vienres 9 d'agostu (21 hores, de 19 a 22 euros) esti conciertu especial de nome ‘Un hermanamientu industrial. La navale-El naval. Deux chantiers navals de l'Atlantique (Dos astilleros del Arcu Atlánticu). Saint Nazaire-Gijón’ creáu por Alain Pennec y Ropers Didier de manera esclusiva pal Festival  Intercéltique de Lorient, nel que participen la Orchestre de Jazz de Bretagne, la Bagad de Saint-Nazaire y los músicos asturianos Iñaki S. Santianes y David Varela. L’espectáculu trátase d’un homenaxe a estes dos ciudaes, “coneutaes per mar mientres décades y históricamente pol pasáu industrial al traviés de los sos respeutivos astilleros navales”, asina como “a toles persones que trabayaron nestos símbolos de la cultura industrial bretona y asturiana, que vivieron casi, de forma simultánea, los años d’espansión, la reconversión industrial, el declive…”, esplica Varela, miembru de La Bandina.

L’acordionista bretón, una personalidá nel so país, recibe tolos años l’encargú de la direición del Festival Interceltique de Lorient de crear y producir un espectáculu “qu'amuese, musicalmente, los llazos d'unión que puedan esistir ente la identidá cultural que, al traviés de festival, Bretaña tresmite al mundu enteru, y el país celta homenaxáu en cada edición, nesti casu Asturies”. Amás de trabayar nel desendolcu d’esti espectáculu musical y visual dedicáu a Saint-Nazère-Saint-Nazaire y Xixón, Pennec aprovechó la so estancia n’Asturies pa dar una clase maxistral d’acordión diatónicu na Escuela de Música de Tinéu.