Peligru mediuambiental en Cuideiru

El Colectivu Ecoloxista d'Avilés posicionóse ayeri al traviés d'un duru comunicáu sobre l'asuntu de la estracción d'arena en Cabu Vidíu, onde diz que'l debate ta centrándose namás nes compensaciones económiques a los pescadores y escaeciendo les repercusiones mediuambientales de la operación, consistente na estracción de más de 400.000 metros cúbicos d'arena del fondu d'un de los caladeros más importantes de la costa asturiana.

Los ecoloxistes recuerden que'l proyectu de Vidíu tuvo contradicciones y xeneró opiniones al favor y en contra dende un primer momentu. Esti proyectu forma parte d'una actuación conxunta que comprendía tamién la construcción del espigón que llinda cola ría d'Avilés, desaniciar parte del cai de San Xuan de Nieva pa facer playa d'ello y acabar col problema de la perda d'arena que carecíen la playa del Espartal y la de Salinas. El Colectivu Ecoloxista d'Avilés diz qu'ente les mesmes alministraciones asturianes nun lo víen claro, y asina la CUOTA llegó a informar negativamente sobre'l proyectu nel so conxuntu, sorrayando que podíen esistir otres alternatives distintes a Vidíu y que yera preciso facer un estudiu d'impactu más ampliu que'l que se presentó naquel momentu y que nun incluyía aspectos xeomorfolóxicos, ente otros. La CUOTA, organismu máximu de xestión del territoriu n'Asturies, apuntaba que'l problema de la perda d'arena en Salinas venía de los llabores de draga que taben faciéndose na Ría d'Avilés

Demarcación de Costes, naquel añu 99, nun atendió pal informe de la CUOTA en cuantes que nun yera vinculante y siguió col trámite del proyectu, aprebándolu acordies coles sos previsiones. El Colectivu Ecoloxista diz que l'estudiu d'impactu col que se dio de pasu la operación y que se presentó como "preliminar" nun cumple colos mandaos de la llexislación estatal y europea, ello con ser importantes y graves los efectos que se reconocíen yá nesti estudiu, casu de les playes de Dories y la Cueva, al occidente del Cabu Vidíu y que sufriríen una perda d'arena proporcional al desequilibriu que diba producise en tola cadena. D'otra manera, según el colectivu conservacionista avilesín, reconocíase nesti estudiu un impactu "severu" sobre los recursos pesqueros.

Por too ello los ecoloxistes tienen pa ellos que se tomó una decisión "precipitada" con tal de contar cola financiación de la Unión Europea pa la obra, una financiación que llega a los 9 millones d'euros. Pa mas aquello, el grupu avilesín concueya cola idea, yá apuntada por dellos especialistes, de que la playa de Salinas taba recuperando arena ella sola tres de rematase l'espigón nuevu d'Avilés, colo que la previsión de saca d'arena podía menguase a lo menos un 20% sobre los 400.000 metros cúbicos previstos. Finalmente, el comunicáu sorraya la esistencia d'un peligru a llargu plazu, yá espresáu pol profesor de la Universidá d'Uviéu Germán Flor, que llamaba l'atención sobre'l dañu que Salinas y l'Espartal lleven años sufriendo a cuenta de los dragaos na Ría d'Avilés.