Peligra la RTPA pola esistencia de sentencies que-y obliguen a asumir a trabayadores de productores

La esistencia de más de 40 demandes que derivaron, de momentu, nuna decena de sentencies qu’obliguen a la RTPA asumir a trabayadores de productores, podría llevar al pieslle del ente. Ésti tien una deuda de 18,9 millones.
 
Luis de la Vallina, viceconseyeru de Seutor Públicu, alvirtió d’esta posibilidá tres dar a conocer güei estos datos nuna rueda de prensa convocada pa tratar namái esti asuntu. Na mesma, esplicó qu’esta situación, susceptible d’empeorar, súmase a "una deuda mui superior a les retenciones alcordaes pol Gobiernu del Principáu" de 11,3 millones d’euros, colo que la situación económica ye "inasumible". De la Vallina aseguró que se traten de "dos situaciones gravísimes" que venceyó a "una xestión nefasta del ente y de les sos sociedaes" por parte de los responsables, contra quienes el Gobierno estudia emprender aiciones llegales. Pel momentu, el voceru del Executivu señaló que dende’l Gobiernu diéronse instrucciones al direutor actual, Antonio Virgili, pa que ponga fin a la situación que motivaron les demandes por cesión illegal de trabayadores, anque alvirtió que "el mal ya ta fechu" y "el panorama ye prietu".
 
Asina, alertó de qu’estos "incumplimientos de la normativa llaboral" podríen derivar en "más de 200 demandes d’equí a un periodu non mui llonxanu", coles que "los trabayadores cedíos de manera illegal pueden pasar a selo del ente de Comunicación". Darréu, criticó que’l responsable anterior de la cadena, Juan José Guerenabarrena, "ocultase" la situación verdadera qu’atraviesa la RTPA "inclusive na Comisión de Control del Ente Públicu de la Xunta Xeneral del Principáu", onde, amás, "negó la esistencia de fraude dalgún, reconociéndolo namái depués de que la diputada –Cristina Coto– manifestase que tenía nel so poder trés sentencies". De la Vallina informó que’l Gobiernu tuvo conocimientu d’esta situación recién como consecuencia de la información ofrecida a los miembros del conseyu d’alministración del ente públicu de comunicación.
 
Responsabilidá de Guerenabarrena
 
Por too ello, concluyó que Guerenabarrena –persona acusada dende la seición de CSI nel ente de ser “alérxica al asturianu”–  yera necesariamente conocedor de les práutiques de cesión illegal de trabayadores que se desarrollaben dende hai años ente la TPA, salvo neglixencia absoluta o grave nel exerciciu de les sos funciones". Les sentencies destaquen que trabayadores de subcontrates dependieron de forma esclusiva de la empresa principal, sobre manera no relativo a disposición horaria. Amás, De la Vallina incidió en qu’ún de los trabayadores que la so situación dio llugar al aniciu de les actuaciones de la Inspeición de Trabayu "llegó a formar parte de los servicios mínimos de la TPA durante la fuelga de marzu del 2010".
 
La sentencia del Xulgáu de lo Social númberu 1 de Xixón termina dando la razón a los trabayadores declarando qu’esiste una cesión illegal que dará derechu a éstos a escoyer en cuála de les dos empreses quieren adquirir la condición de emplegaos. Pela so parte, el fallu de la Sala de lo Social del Tribunal Superior de Xusticia d’Asturies (TSXA) que ratifica l’anterior alude a "una maniobra de TPA pa evitar la consolidación d’un puestu de trabayu al traviés d’escuses artificioses d’obligar primero a los trabayadores a constituyir una sociedá y adscribise depués a una empresa que nun pon nada n’absoluto na contratación que se diz mantener con TPA". "Esta situación, xenerada pol Gobiernu y equipu direutivu de la RTPA anterior, ha de ser puesta en conocimientu de la opinión pública, con caráuter previu a la campaña eleutoral, cola fin de dar a conocer les práutiques siguíes en materia de contratación dientro de la RTPA y que, cuando tuvo conocimientu, el Gobiernu mandó eliminar de mou radical", aseguró.