Películes ingleses de cuando la Guerra

Primero de que llegare la televisión, les cases de películes informatives que se proyectaben nes sales de cine facíen el papel que tienen agora los partes de noticies. Una de les cases más importantes, que trabayó esti campu dende primeros del XX hasta los años 70 foi la inglesa British Pathé, qu'amás de cubrir informaciones de les islles, tamién mandaba corresponsales a los acontecimientos internacionales más importantes. La Guerra Civil d'España, etapa prólogu de la II Guerra Mundial, llamó l'atención de les cámares de la Pathé, que retrataron los momentos clave de la Guerra

Agora que la Pathé decidió poner na rede el catálogu cásique enteru de películes antigües que tien, l'equipu d'Asturies.com anduvimos rabilando a la gueta de referencies al país, y alcontramos, con sorpresa, dos películes "asturianes" nel archivu de la Pathé. Entitulaes "Oviedo relieved" (Uviéu lliberada) y "Franco's Drive on Gijón" (entrada de Franco en Xixón) les cintes enseñen la toma de les dos ciudaes. Anque pa descargar les películes enteres hai que pagar, Pathé dexa baxar unes amueses de poco más d'un minutu que resulten de lo más interesante. La pelicula dedicada a Xixón nun se ven imáxenes de la ciudá, pero los comentarios de la voz del reporteru inglés inclúin frases que val la pena reproducir, como cuando diz "Franco's men are still advancing and the last stronghold to the basques are asturian miners" (los homes de Franco avancen y la mayor resistencia qu'alcuentren los vascos ye la de los mineros asturianos) hasta que tomen la ciud'a que ye "un pequeñu puertu de pesca (tiny fishing port). Anque más estraña cuando esplica que "Xixón ye agora la capital vasca" "The basque capital is now guixón" (pronunciao asina).

La película de la toma d'Uviéu, muncho más interesante no visual, tien tomes de la catedral, de la ciudá cola tropa nacional entrando y de la estación del tren, amás d'unes tomes d'unos tanques que paez que nun son d'Uviéu y podríen tan cortaes d'otru documental. la voz n'inglés esplica como la batalla foi la más importante sacantes la del Alcazar y como "El Xeneral Aranda aguantó a lo llargo de trece sorprendentes selmanes l'acosu de los mineros, que con bombes de fabricación casera, ficieron un reinu de destrucción"

Les cintes puen comprase en vhs nel web de la British Pathé, pero Asturies.com ofrezvos pa descargar les versiones curties. Pa baxales, clicái col botón derechu del ratón y marcái "guardar destín como": Lliberación d'Uviéu - Franco entra en Xixón. Como los testos son casi tan importantes como les vistes, vamos intentar traducilos enteros, una xera n'agradeceríemos la collaboración de los nuestros lectores. Quien tenga vagar nello pue escribir a esta dirección d'email

Contador Estadistiques