Péguen-y dos tiros a un dirixente sindical col que tenía d’entrevistase Rafael Palacios en Colombia

El Director de Cooperación del Gobiernu Asturianu, Rafael Palacios, ta desarrollando estos díes un viaxe a Colombia pa conocer la situación del país y los proyectos que ta desarrollando ellí l'executivu asturianu.

Dientro de les actuaciones a desarrollar nel viaxe, el Director de l'Axencia Asturiana de Cooperación al Desarrollu tuvo una llaga entrevista col Defensor del Pueblu Colombianu, Volmar Pérez Ortiz, al que-y tresmitió'l so esmolecimientu pola violación que se fai de contino en Colombia de los Derechos Humanos, la falta de castigu a les persones y organizaciones illegales qu'atenten contra estos derechos y sobre la esistencia d'informes d'asociaciones de defensa de los Derechos Huanos que falen de que'l gobiernu colombianu ta dando pasos alantre pa llegalizar a grupos paramilitares. Na reunión falóse tamién de la masacre de San José de Apartado, onde los paramilitares asesinaron a siete persones, ente elles dos neños de 4 y 6 años.

Palacios visitó tamién la cárcele de muyeres del Buen Pastor en Bogotá, onde s'entrevistó cola sindicalista agraria Luz Perly Córdoba, encarcelada ensin xuiciu dende febreru del 2004 y cola tamién sindicalista Rosel Bernal que lleva 22 meses presa a la espera de xuiciu, una situaciónna que tamién lleva 11 meses presa na mesma cárcele la dirixente cristiana de base Brisedil Guerrero. Estes muyeres tresmitiéron-y al director de cooperación asturianu les graves condiciones de falta de recursos y masificación que carecen nun presidiu en que se-yos amenaza amás con retirá-yos la custodia de los sos fíos en casu de protesta.

El director de cooperación ta acabante de ser testigu de la situación d'estrema violencia en que se desenvuelve la vida colombiana. Palacios tenía acutada pa mañana vienres una entrevista con Rafael Cabarcas, presidente de la central sindical colombiana USO-Cartagena, pero'l sindicalista ta agora mesmo nun hospital con pronósticu reserváu dempués de recibir esta mesma mañana dos tiros de bala na cabeza por persones desconocíes que pasaben al llau d'elli nuna moto ensin identificar.