‘Pegoyu, almacén d’horros’, proyeutu pa facilitar la conservación y restauración d’estos bienes

|
Pieces nel CETEMA proyeutu 'Pegoyu, almacén d’horros'

El Centro Tecnológico y Forestal de la Madera (CETEMAS) acueye’l proyeutu ‘Pegoyu, almacén d’horros’. Nes sos instalaciones guárdense pieces d’horros y paneres desmontaos pa ponela a disposición de les persones interesaes n’aprovechales pa restauraciones.

Nestos momentos almacena pieces d’ocho hórreos y paneres d’Illas, Mieres, Ayer, Carreño, Piloña, Candamu y Grau –dos nesti conceyu– desmontaos por ruina nel 2021 previo informe del Conseyu del Patrimoniu Cultural. Llueu de la receición y el tratamientu de la madera nel CETEMAS, asitiáu en Carbayín, nel inventariu figuren colondres, engüelgos, pegoyos, tables, mueles, vigues, moños, trabes, lliños o sobrelliños, pa potenciales actuaciones.

“Cualquier persona que quiera restaurar el so horru o panera, recuperalu o mantenelu, va tener toles facilidaes por parte de la conseyería y d’esa manera protexer esi patrimoniu riquísimu, únicu, específicu y identitariu”, esplicó Berta Piñán. La responsable de Cultura, Política Llingüística y Turismu, que visió’l CETEMAS esta mañana xunto col alcalde de Siero Ángel Antonio García González 'Cepi', rescampló “la teunoloxía qu’hai equí y tol conocimientu qu’hai sobre la madera y el so tratamientu”.

Patrimoniu va siguir xestionando esti añu los llabores de recoyida de pieces de construcciones en mal estáu y va habilitar un sistema de solicitú d’estos elementos etnográficos pa la so reutilización de baldre en restauraciones. Amigos del Hórreo encárgase de les trés primeres fases del procesu, esto ye, el so desmontaxe; el tresporte hasta Siero al CETEMAS y un informe téunico sobre la operación fecha, los materiales recoyíos y la so valoración, y les midíes aconseyaes pa la so conservación; y la presentación d’un protocolu con fluxogrames, llabores y documentación del procesu, fechu en collaboración cola conseyería, los conceyos y los propietarios.

Segunda fase

Llueu de la receición de los materiales rescataos, la Fundación CETEMAS asume la siguiente fase del procesu. Asina, nel 2021 habilitó l’espaciu físicu pa l’almacenamientu de les pieces y entamó la ellaboración d’un inventario.

Pa l’allugamientu del almacén analizáronse les condiciones ambientales del espaciu, al ser la humedá relativa y la temperatura factores esenciales pa la conservación de la madera, de manera especial nel casu d’estes pieces patrimoniales d’altu valor. D’igual forma evaluáronse les diferentes téuniques empleagaes pa la carauterización non destructiva de la madera pa, finalmente, definir los protocolos de midición, toma de datos y cálculu de propiedaes que se’apliquen a los materiales.

El protocolu de receición de pieces tien cuatro fases: descarga, etiquetáu individual y llimpieza per aciu d’agua a presión pa eliminar elementos estraños; secáu n’esterior hasta la retirada de la humedá superficial; aplicación del productu superficial protector anti-carcoma y posterior secáu al aire; y colocación nel almacén interior de pieces susceptibles (tables y colondres) y de gran tamañu nel esterior (trabes, pegoyos o mueles). Cultura financió nel 2021 con 25.000 euros el procesu de recuperación de los elementos etnográficos, de los que 10.000 van pal desmontaxe y rescate de les pieces, que fai Amigos del Hórreo, y 15.000 al tratamientu y almacenaxe, a cargu de CETEMAS, cantidaes que se van repetir esti añu.

Iniciativa promovida dende la Mesa del Horru

‘Pegoyu, almacén d’horros’ ye una iniciativa promovida nel senu de la Mesa del Horru, constituyida por la Conseyería de Cultura, Política Llingüística y Turismu en febreru del 2020 p’abordar los aspeutos esenciales na xestión patrimonial de los horros, garantizar el so futuro y salvaguardar el so valor cultural. Esti órganu ta integráu por espertos, profesionales y representantes d’entidades de diferentes ámbitos venceyaos col so estudio, restauración y conservación.

Contador Estadistiques