Pedru Pereira, Tarañu y Skanda finalistes del Premiu al Meyor Cantar n'asturianu

El premiu d'Asturies.com al Meyor cantar n'asturianu 2004 yá tien finalistes, los votos de los nuesos llectores colocaron a "Xedre" de Pedru Pererira, "Nun mos dexen" de "Tarañu" y "Sangre d'Ochobre" de Skanda na final. Agora entama'l Conceyu Abiertu pa escoyer el cantar ganador.

Les votaciones tuvieron mui reñíes hasta última hora del pasáu llunes. Les dos primeres posiciones paecíen inamovibles, con "Nun mos dexen" del grupu folk "Tarañu" y "Sangre d'ochobre" del grupu "Skanda" y asina foi hasta'l final, pero quedaba la dulda por ver quien entraba nel tercer puestu, que foi a la fin pa Pedru Pereira col so tema "Xedré", cantar que-y da'l nome al primer discu del cantautor de Cangas del Narcea, discu que ye tamién un éxitu de ventes nos pocos meses que lleva en mercáu. Tamién tuvieron cerca d'entrar a la terna final "Deua Dubra" con "Lin", Toli Morilla o "La Tarrancha" xunta los lluanquinos "Skama la Rede" que tuvo munchos votos pal so tema "Nel campu de batalla"

Agora n'Asturies.com proponémos-yos a los nuesos lectores que voten y opinen sobre'l tríu final de cantares al traviés d'esti Conceyu Abiertu. Nelli va poder votase ente "Xedré", "Sangre d'ochobre" y "Nun mos dexen" a lo llargo de los próximos quince díes. En pasando esos quince díes el cantar que más votos reciba va ser el ganador d'esta II edición del Premiu al meyor Cantar n'asturianu d'Asturies.com. Nos próximos díes tamién vamos dar anuncia de quien son los ganadores de los llotes de regalos que sorteábemos ente los participantes. Gracies a los nuestros patrocinadores, les cases de discos "L'Aguañaz" y "Fonoastur", los ganadores van llevar un llote de discos y llibros pola so particpación na primer fase de les votaciones.