Paz González Mesa y Xandru González Fernández ganen el concursu Indumentaria

|

La calidá de los traxes y l'ésitu de públicu consoliden el Día’l Traxe’l País como la gran fiesta de la indumentaria tradicional asturiana.

Esti añu nun fueron los paños finos nin los traxes de gala los que s'alzaron col favor del xuráu na segunda edición del concursu Indumentaria, que se celebró'l domingu 1 d'ochobre en Grau, sinón la llana y l'estameña, texíos propios de les clases humildes asturianes del sieglu XIX. Asina, los primeros premios del concursu fueron pa Paz González Mesa y Xandru González Fernández, que llucieron, ella, pieces iguaes con llana filada a mano, texida en telar y tiñida con tintes naturales pola mesma Paz, que vistió una camisa antigua y calzó madreñes d'escarpín ferraes con clavos feches pol postreru madreñeru de Viḷḷar de Vildas en 1994. Él vistió prendes feches con llinu antiguu y con llana filada a mano en telar y tiñíes con tintes naturales de manera artesanal y madreñes del mesmu madreñeru somedanu. Los segundos premios fueron pa Alba Cascudo Loza y Héctor Díez Requejo, quien llucieron tayes d'estameña, él con chaqueta y calzones marrón y chamarreta mariella y ella con saya azul, xugón marrón y dengue negru. Los dos calzaron madreñes d'escarpín ferraes con clavos tamién.

Tocantes a los terceros premios, el de la categoría de muyer correspondió a unu de los traxes que más llamaron l'atención del públicu qu'asistía al desfile na Plaza los Dolores: el de vilba que vistió Ana María Ardura Parrondo, quien llevaba la montera -prenda d'usu de normal masculín- sobro'l pañuelu de cabeza negru, qu'indicaba, nos usos sociales asturianos, que yera ella quien llevaba'l mandu de la casa. Na categoría de home, el tercer premiu correspondió a Rubén Alonso Castrillo, quien llevó un traxe de diariu de la zona central compuestu de calzón, xilecu y chamarra d'estameña marrón, con faxa de llana texida, camisa y calzonciellu de llinu blancu, medies pintes y calzáu con botes de piel vuelta y tocáu con montera parda.

El xuráu, formáu polos espertos Amadéu Benavente, Constantino Menéndez, Consuelu Riu, y Ana Villanueva, destacó l'alta calidá de los traxes esibíos, detrás de cada unu de los cualos hai un trabayu de documentación sobro los distintos cortes, texíos o complementos que s'usaben n'Asturies mientres la segunda metá del sieglu XIX. Amás, el desfile de los 34 participantes (17 muyeres y 17 homes) sirvió pa que munches persones conozan la gran variedá de traxes tradicionales y cómo estos dexen espresar la personalidá y el calter de la persona que los viste.

El Día’l traxe’l país foi muncho más que'l concursu Indumentaria, yá que, pela tarde, la fiesta continuó na la Plaza’l Mercáu, onde s'armó un gran baille tradicional con pieces tomaes de tola xeografía asturiana: oriente, centru y occidente.

'Indumentaria' y el 'Día’l traxe’l país' son una iniciativa de la empresa de xestión cultural, comunicación y diseñu gráficu B. Alto, en collaboración cola Conceyalía de Festexos del Conceyu de Grau y la Caxa Rural d'Asturies.

Na semeya:  De izquierda a derecha, Ana María Ardura Parrondo, Rubén Alonso Castrillo, Paz González Mesa, Xandru González Fernández, Héctor Díez Requejo y Alba Cascudo Loza. Semeya d'Ojos de Hojalata.

Contador Estadistiques