Paz Andrés va presentase a les eleiciones al Rectoráu de la Universidá d'Uviéu del 2012

La catedrática de Derechu Internacional Públicu, Paz Andrés, anunció esti martes la so decisión de presentase otra vuelta a les eleiciones al Rectoráu de la Universidá d'Uviéu. D'esta forma va volver a competir por esti cargu con Vicente Gotor.

En rueda prensa, Andrés afirmó tar preparada y motivada pa encarar esti retu, yá sía nun duelu frente a Gotor, que yá anunció la so intención de presentase a la reeleición, o frente a más candidatos como asocedió nes eleiciones del 2008, a les que tamién acudieron los catedráticos Santos González y Antonio Cueto. La candidata apuntó que los resultaos algamaos pola xestión del rector actual son "manifiestamente meyorables", tanto na adaptación al Espaciu Européu d'Educación Superior (EEES), tamién conocíu como Plan Boloña, como nes fusiones de centros, na organización de la docencia o'l desarrollu del Campus d'Escelencia Internacional (CEI). D'igual forma aseguró que pretende debatir les sos propuestes con tola comunidá educativa pa diseñar un proyeutu coleutivu que meyore la xestión y motive a alumnos y profesores.

Na so intervención, tamién analizó la propuesta del Gobiernu de crear la Universidá Politéunica Xovellanos en Xixón asegurando que la Universidá d'Uviéu cuenta con una politéunica "escelente". Por eso, apostó por promover lo esistente, dao que "ye difícil crear dalgo meyor", y mostróse contraria a facer competir a la universidá asturiana con otra de caráuter priváu al entender que sería "disgregador y emprobecedor", al tiempu que recordó que dende la conseyería reconocióse que'l proyectu nun ta desenvueltu. Con too, Andrés calcó na importancia de caltener en tou casu, el respetu institucional y una "llealtá clara" ente'l Gobiernu de la Universidá y l'Executivu nacional.