Patrimoniu apreba la restauración de San Miguel de Lliño

La Comisión de Patrimoniu de la Conseyería de Cultura d'Asturies aprebó ayeri'l proyectu d'Obres de restauración de la Ilesia de San Miguel de Lliño, ún de los monumentos del conxuntu prerrománicu de la fastera del Monte Naranco n'Uviéu, acordies col proyectu que presentó l'Institutu del Patrimoniu Históricu Español,órganu que depende del Ministeriu de Cultura. Con un presupuestu de 80.283 euros, l'actuación propón facer delles obres d'urxencia como'l reteyao, sostitución del suelu y llabores de caltenimientu na carpintería de la ilesia del periodu ramirense de la monarquía asturiana (842-850).

El restu de la inversión va acutase pa estudios a más llargu plazu sobre les pintures de la ilesia y l'estáu de conservación de la piedra del monumentu, con vistes a futures actuaciones. L'arquitectu Fernando Nanclares ye'l responsable del proyectu d'obra en San Miguel, que va asina a remocicase poco dempués de que se ficiere otru tanto cola so "hermana" la ilesia de Santa María del Naranco.

La comisión de patrimoniu alcordó tamién la declaración de Bien d'Interés Cultural de la Casa de los Guzmán d'A Veiga, un proyectu de remocique pa usos culturales del ábside y edificiu apegáu a la ilesia de Santa María de Villamayor en Piloña y l'estudiu previu pal remocique y cambéu d'usu de la Casa de la Rúa n'Uviéu, que va dedicase parcialmente a usos culturales y sociales.