Pasu atrás pal refuxu del Meicín

La Comisión d'Urbanismu y Ordenación del Territoriu d'Asturies (CUOTA) dio informe en contra de la obra d'ampliación del refuxu del Meicín en Penubina, una instalación que venía col sofitu del Conceyu de L.lena y de la Dirección de Deportes del Principáu y contra la qu'alegaren bien de colectivos de montañeros y les más de les organizaciones ecoloxistes del país.

Les protestes pol proyectu del Meicín llegaron al Tribunal Superior de Xusticia d'Asturies, a la Xunión Europea, al Ministeriu d'Educación, Cultura y Deportes y a la CUOTA, organismu que tenía muncho que dicir nel tema en cuantes qu'entidá suprema d'ordenación del territoriu n'Asturies. Mientres los colectivos contrarios a la obra, axuntaos nuna plataforma de defensa del Meicín, llevaben les sos alegaciones a tolos organismos competentes, la Conseyería de Cultura seguía puntu por puntu col plan del Meicín, y asina yera que cuando la quexa llegaba a la CUOTA, Cultura contrataba la obra pa facer el refuxu cola empresa Ibersilva SA, que tenía un plazu d'once meses pa facer la obra.

Los argumentos que llevó la plataforma a la CUOTA teníense en que la obra valtaba'l Plan Xeneral d'Ordenación Urbana del conceyu de L.lena, un plan aprebáu dempués de que se presentare l'ampliación y que nes sos sos normes subsidiaries apauta que en casu de facese obra en suelu non urbanizable y d'especial protección, les construcciones esistentes tendríen de caltener el so volume. Nesti sentíu, l'artículu 316 d'estes normes subsidiaries tamién diz que l'altura másima en mediu rural ye de dos plantes , mientres que'l proyectu presenta tres pisos. Los materiales emplegaos nel edificiu tampoco nun concasaríen cola lletra del PXOU, al dicir de la plataforma.

L'ampliación del refuxu del Meicín ye un asuntu que vien de vieyo. Nel añu 2002 el Conseyeru d'Educación y Cultura yá anulare la tramitación en cuantes que la obra nun tenía estudiu d'impactuambiental, anulación que se repitió el 9 d'ochobre del 2002, esta vegada por irregularidaes nel trámite d'información pública del estudiu d'impactu, y otra vegada más el 13 d'avientu d'esi añu, cuando la noticia salió en BOPA. Un añu dempués, el 16 d'ochobre de 2003, el proyectu diose de pasu, y el 6 de payares el BOPA dio anuncia de la licitación de la obra. La resurrección del proyectu pal refuxu del Meicín saldose con cerca de 1.000 escritos d'alegación ente los qu'había 9 de clubes de montañismu, 14 de grupos ecoloxistes, sindicatos y profesores de la Universidá d'Uviéu. El proyectu pa l'ampliación ye enforma polémicu en cuantes que supón la demolición del edificiu actual y la construcción d'otru nuevu con tres altures col doble de volume y capacidá.

La decisión de la CUOTA supón un pasu atrás y un retrasu, pero nun quier dicir que l'asuntu muerra equí. El proyectu va volver a presentase con cambeos que permitan que la CUOTA lu dea de pasu