Pasu atrás pal Farho Xixón Baloncestu

Cola derrota por 93-87 nel partíu escontra La Palma, el Farho Xixón Baloncestu complica les sos posiblidaes de metese nel “play-off” d´ascensu. Agora los xixoneses son undécimos a una victoria de C. B. Los Barrios, que ganó al C. B. Valls. Esto fai que seya fundamental ganar el sábadu al Menoría Basket y xugalo too nel últimu partíu en Los Barrios.

Les notes positives foron les derrotes del Cáceres 2016 C. B. en Melilla y del Plasencia Galco na so casa col León Caja España, que los dexen empataos a quince victories colos xixoneses.
El partíu foi mui igualáu y namás que se decidió nos últimos minutos, cuando dos triples d´Edwards separtaron nel marcador a los locales, que xunto al aciertu de los canarios nos tiros llibres, llevólos a ganar l´alcuentru. Una de les aspeutos a destacar ye l´aciertu de los locales nel tiru esterior, con 13 triples encestaos de 25 intentos, por 5 de los asturianos en 21 intentos.


Nel primer cuartu La Palma foi nidiamente superior a los xixoneses, colocando les primeres diferencies de siete puntos, 17-10, colos triples d´Edwards, Hawkins y Burgos. La ventaya foi mayor con un 25-14, pues los asturianos yeren nulos nel ataque. A lo cabero`l cuartu`l resultáu foi de 25-18 pa los locales.
Nel segundu cuartu les coses camudaron y un mayor aciertu nel ataque con Young echándose al equipu al llombu, punxeron el marcador nun 28-26. Dempués Xavi Vallmajó llevó al equipu a ponese per delantre con un 34-35.

Con Tim Young dominando los aros el Farho Xixón ganaba por un 43-44, anque al descansu llegóse con un 48-47.
El tercer cuartu siguió la igualdá, con pequeñes diferencies nel marcador pa los locales, con Hawkins y Edwards como protagonistes, anque Waleskowski mantenía nel partíu a los asturianos, amás d´una antideportiva de Rubén Ibeas tamién los aidó a metese nél. Asina llegóse al final del cuartu con un 65-63 que dexaba`l partíu abiertu.
Nel caberu cuartu les ventayes yeren mínimes con muncha igualdá, pero Edwards separtó a los locales y esa diferencia foi suficiente pa que ganaran el partíu.


Nel Farho Xixón destacaron Keith Waleskowski (19 puntos, 9 rebotes y 5 faltes recibíes Tim Young (17 puntos, 7 rebotes, 2 asistencies y 7 faltes recibíes) y Saúl Blanco (21 puntos, 3 rebotes y 5 faltes recibíes). Na Unión Baloncesto La Palma rellumó Michael Hawkins (19 puntos, 3 rebotes, 8 asistencies, 4 balones robaos y 5 personales recibíes), Steven Edwards (29 puntos y 3 rebotes), y John Floyd (12 puntos, 5 rebotes, 2 asistencies y 4 faltes recibíes).

Ficha técnica:

Unión Baloncesto La Palma: Michael Hawkins (19), Alex Burgos (6), Steven Edwards (29), Juan Carlos Triguero (4) y John Floyd (12). Tamién xugaron: Drazan Tomic (3), Rubén Ibeas (7), Diego Ferrero (5), Oscar González y Gerrit Brigitha (8).


Farho Xixón Baloncestu: Xavi Vallmajó (7), Saúl Blanco (21), Josep Pacreu (8), Keith Waleskowski (19) y Tim Young (17). Tamién xugaron: Jorge Lledó (2), Antxon Uturbe (4), Rubén Suárez (9) y Chus Poves.


Árbitrios: Carlos Cortés Rey y Ángel Gozález Zumajo. Eliminaos por cinco faltes personales Diego Ferrero y Brigitha. El Farho Xixón nun tuvo eliminaos. Unes 1500 persones nel Pabellón Miraflores de Santa Cruz de La Palma.
Parciales per cuartos: 25-18, 23-29, 17,16 y 28-24.