PAS y URAS defínense como “l’alternativa pa llevar Asturies al llugar que merez”

Esti fin de selmana les executives del Partíu Asturianista (PAS) y la Unión Renovadora Asturiana (URAS) celebraron un alcuentru p'apautar la so llinia política con vistes al decisivu cursu políticu que va rematar nes elecciones autonómiques del 2007. Les propuestes del trabayu conxuntu ente les dos fuerces cuayaron nun manifiestu que denuncia la decadencia d'Asturies nos 25 años que se lleven d'autonomía no tocante a economía y cultura y qu'apunta a "les mayoríes polítiques de corte centralista" como "causa inseparable" de la crisis asturiana.

Énte esta situación la xuntura Unión Asturianista (URAS - PAS) dase a valir como "l'alternativa y la solución pa volver a asitiar Asturies nel llugar que merez ente los pueblos d'España y Europa". Pa entornar l'actual situación PAS-URAS propón un paquete de midíes conxuntes que suponen el primer dibuxu de lo que va ser el programa electoral de la coalición qu'encabecen Xuan Xosé Sánchez Vicente y Sergio Marqués. La política económica, con atención a la innovación tecnolóxica y la mayor defensa de los autónomos, un techu competencial qu'asegure que "nenguna comunidá vaya tener más competencies qu'Asturies" la meyora de la cobertura de les prestaciones sociales y un compromisu por "asturianizar culturalmente la vida social y la enseñanza" son los puntos nos que se tien la propuesta de PAS y URAS, qu'aseguren que son "les úniques fuerces capaces de presentar un compromisu creíble al favor de la cultura asturiana" en cuantes que "yá demostraron bien de vegaes nel pasáu el so compromisu cola cultura asturiana y l'asturianidá".