Partidarios de Cascos presenten el partíu Foro Asturias

La Plataforma 'Pasemos a l'Acción', compuesta por partidarios del ex vicepresidente del Gobiernu Francisco Álvarez-Cascos, rexistraron un nuevu partíu, Foro Asturias, col que van acudir a les próximes elecciones n'Asturies.

La última vez que Cascos mostró la so disponibilidá ante miembros d'esta plataforma pa encabezar una alternativa n'Asturies al PSOE y al PP foi'l pasáu domingu nel conceyu asturianu de Navia. Los simpatizantes del ex ministru treslladáron-y el so deséu de qu'encabezara un proyectu políticu, una vez que'l PP refugó qu'ésti fuera la cabeza de llista n'Asturies pa les próximes elecciones autonómiques y llocales.
  
Ente los asistentes a esti actu en Navia alcontrábense l'ex senador y voceru de 'Pasamos a l'acción', Isidro Martínez Oblanca, el ex conceyal del Conceyu de Navia Carmen Isabel López y l'ex conceyal del Conceyu de Les Regueres José Manuel Fernández.
  
El PP d'Asturies llevaba contabilizaos el pasáu llunes 313 baxes d'afiliaos y 334 altes tres la baxa presentada pol ex vicepresidente del Gobiernu y ex ministru de Fomentu.
  
Algunos de los militantes que se dieron de baxa del PP mostraron la so discrepancia cola decisión de la dirección estatal del partíu de "imponer" a Isabel Pérez-Espinosa como candidata a la presidencia d'Asturies sin dar la oportunidá a los afiliaos asturianos a que se pronunciaren sobre una candidatura alternativa encabezada por Cascos.

Álvarez-Cascos, cabezaleru
Ún de los xestores del nuevu partíu averáu al ex ministru Francisco Álvarez-Cascos, l'abogáu Gonzalo Botas, definió esti xueves a Foro Asturias como un partíu "esencialmente asturianu", constituyíu por profesionales y abiertu a la sociedá civil.

En declaraciones a Europa Press, esplicó que'l primer oxetivu ye que l'ex ministru acepte la ufierta pública que supunxo la constitución y presentación, pa que seya'l cabezaleru de llista nes próximes elecciones autonómiques.
  
"Tamos a disposición de Cascos pa que si quier mos garre como l'equipu que demandaba", dixo pa de siguío puntualizar qu'él "nun taba enteráu" y "nun tien nada que ver".
  
Botas señaló que Foro de Ciudadanos –el nome del partíu n’ámbitu estatal- va celebrar nel plazu averáu d'un mes un congresu nel que se va designar la xunta directiva. De momentu, calcó en que'l trabayu céntrase en sumar adeptos pa causar "l'efectu definitivu". Al respecto, recordó que dende la plataforma d'apoyu al ex ministru 'pidieron la palabra' y, como nun la dieron, agora 'Pasen a l'acción'.
  
Amás, indicó que "hai tiempu abondo" p'acudir a les elecciones nes trés circunscripciones y los 78 conceyos asturianos.
  
A lo último, y en relación al nome del nuevu partíu (FA), -nel que les sos sigles coinciden coles iniciales de Francisco Álvarez- comentó qu'embaraxaron bautizalu La Sestaferia, en relación a la prestación vecinal pal arreglu de caminos o otres obres d'utilidá pública, a que los vecinos teníen obligación d'acudir los vienres en ciertes époques del añu. Pero, el desconocimientu xeneralizáu fízo-yos inclinase pola opción de Foru, como "llugar d'alcuentru".
  
De momentu, Foro Asturias ta constituyíu por 14 xestores y tien la so sede na cai General Elorza d'Uviéu. "Nun ye un partíu d'élites, somos una sociedá abierta onde toos puen entrar a sumar como les formiguines del logu", acaba Botas.